देऊळगाव राजा|राहुल नायर
देऊळगाव राजा तालुक्यातील दगडवाडी येथे एका शेतकऱ्याचा मृतदेह घराच्या मागील बोळीत आढळल्याने संपूर्ण गावात खळबळ उडाली आहे. नंदाजी दुर्योधन घुगे (वय ४७) असे मृत शेतकऱ्याचे नाव असून, शुक्रवारी सकाळी ही धक्कादायक घटना उघडकीस आली.
मिळालेल्या माहितीनुसार, नंदाजी घुगे गुरुवारी रात्री नऊ वाजेपर्यंत घरातच होते. रात्रीचे जेवण झाल्यानंतर कुटुंबीय नेहमीप्रमाणे झोपी गेले. मात्र शुक्रवारी सकाळी सातच्या सुमारास शेजारी राहणारे योगेश शिवाजी घुगे यांना नंदाजी घराच्या मागील बोळीत पडलेले दिसले. ही बाब लक्षात येताच त्यांनी तात्काळ घुगे कुटुंबीयांना याची माहिती दिली.
घटनेची माहिती मिळताच कुटुंबीय धावतच घटनास्थळी पोहोचले. मात्र नंदाजी यांच्याकडून कोणताही प्रतिसाद मिळत नसल्याचे लक्षात येताच त्यांनी तातडीने ‘११२’ या आपत्कालीन क्रमांकावर संपर्क साधला. काही वेळातच पोलीस व वैद्यकीय पथक घटनास्थळी दाखल झाले.
घटनास्थळावरून पोलिसांनी नंदाजी घुगे यांना तातडीने देऊळगाव राजा येथील शासकीय रुग्णालयात दाखल केले. तेथील वैद्यकीय अधिकाऱ्यांनी तपासणी केल्यानंतर त्यांना मृत घोषित केले. नंदाजी यांचे जुळे बंधू सुभाष दुर्योधन घुगे यांनी याबाबतची माहिती पोलिसांना दिली, त्यानुसार पोलिसांनी आकस्मिक मृत्यूची नोंद केली आहे.
देऊळगाव राजा पोलीस ठाण्याने या प्रकरणी आकस्मिक मृत्यूची नोंद करून पुढील तपास सुरू केला आहे. घटनेमागील नेमके कारण आणि परिस्थिती स्पष्ट करण्यासाठी पोलीस अधिक तपास करत आहेत. या घटनेमुळे दगडवाडी परिसरात हळहळ व्यक्त होत आहे.
✅ आमच्या WhatsApp ग्रुपमध्ये सामील व्हा »
