बुलढाणा |भागवत गायकवाड
धाड पोलीस ठाण्याच्या हद्दीतील करडी फाटा येथील भोंडे पेट्रोल पंपावर झालेल्या चोरीच्या गुन्ह्याचा स्थानिक गुन्हे शाखेने अवघ्या काही दिवसांत यशस्वी उलगडा केला आहे. या कारवाईत एका आरोपीला अटक करण्यात आली असून चोरीस गेलेली ₹1 लाख 5 हजारांची संपूर्ण रक्कम जप्त करण्यात आली आहे. जलद तपास, तांत्रिक विश्लेषण आणि गुप्त माहितीच्या आधारे पोलिसांनी ही कारवाई करत गुन्ह्याचा छडा लावला.
पोलीस अधीक्षक निलेश तांबे यांच्या आदेशानुसार स्थानिक गुन्हे शाखेचे पोलीस निरीक्षक आशीष रोही यांच्या नेतृत्वाखाली विशेष पथकाने समांतर तपास सुरू केला. तपासादरम्यान मिळालेल्या तांत्रिक माहिती, सीसीटीव्ही फुटेज आणि गुप्त बातमीदारांकडून मिळालेल्या माहितीच्या आधारे पोलिसांनी संशयिताचा शोध सुरू ठेवला.
या तपासात स्वप्नील नुदाराम वाघमारे (वय 19, रा. मरमोंढाळा, ता. जि. बुलढाणा) याला ताब्यात घेण्यात आले. सखोल चौकशीदरम्यान त्याने चोरीची कबुली दिली. त्यानंतर आरोपीकडून चोरीस गेलेली ₹1,05,000 इतकी संपूर्ण रोकड जप्त करण्यात आली. त्यामुळे फिर्यादीचे मोठे आर्थिक नुकसान टळले.
ही घटना करडी फाटा येथील भोंडे पेट्रोल पंपावर घडली होती. फिर्यादी खंडू संतोषराव भोंडे (रा. म्हसला बु., ता. जि. बुलढाणा) यांच्या तक्रारीवरून धाड पोलीस ठाण्यात गुन्हा क्रमांक 273/2026 अंतर्गत भारतीय न्याय संहिता (BNS) 2023 च्या कलम 303(2) नुसार गुन्हा दाखल करण्यात आला होता.
या यशस्वी कारवाईत अपर पोलीस अधीक्षक अमोल गायकवाड, अपर पोलीस अधीक्षक पीयूष जगताप यांच्या मार्गदर्शनाखाली पोलीस निरीक्षक आशीष रोही, PSI प्रताप बाजड तसेच स्थानिक गुन्हे शाखेच्या अधिकारी व कर्मचाऱ्यांनी महत्त्वाची भूमिका बजावली.
दरम्यान, या प्रकरणाचा पुढील तपास धाड पोलीस ठाणे करीत असून आरोपीकडून इतर गुन्ह्यांबाबतही चौकशी सुरू असल्याची माहिती पोलिसांनी दिली आहे.
📲 KattaNews.in WhatsApp ग्रुप जॉईन करा
बुलढाणासह महाराष्ट्रातील ब्रेकिंग न्यूज, सरकारी योजना, शेती, नोकरी, शिक्षण आणि महत्त्वाच्या घडामोडी सर्वात आधी मिळवण्यासाठी आमच्या WhatsApp ग्रुपमध्ये सहभागी व्हा.
संबंधित बातम्या
- चिखली पोलिसांची मोठी कारवाई! MPDA अंतर्गत सराईत गुन्हेगार 1 वर्षासाठी स्थानबद्ध, दोघांना 3 महिन्यांसाठी तडीपार
- गरीबांच्या ताटातील घास लुटण्याचा प्रयत्न? बुलढाण्यात 41 क्विंटल सरकारी रेशनचा तांदूळ जप्त; पोलिसांची मोठी कारवाई
- जास्तीच्या मजुरीच्या आमिषाने गेला जीव! खडकपूर्णा प्रकल्पात बुडालेली बोट काढताना मजुराचा दुर्दैवी मृत्यू; तिघे पोलिसांच्या ताब्यात
