बुलढाणा |९ मार्च २०२६
बुलढाणा जिल्ह्यातील पातुर्डा येथे घडलेल्या एका धक्कादायक प्रकरणाने संपूर्ण परिसर हादरला आहे. कवठळ परिसरात २ मार्च रोजी झालेला अपघात समजला जाणारा प्रकार प्रत्यक्षात खुनाचा कट असल्याचे पोलिस तपासात उघड झाले आहे. मृतक शिक्षिका वृषाली प्रकाश गावंडे (वय ३७) यांच्या मृत्यूमागे त्यांच्या पतीचाच हात असल्याचे स्पष्ट झाले आहे.
या प्रकरणात पोलिसांनी पती प्रकाश अनंता गावंडे (रा. पातुर्डा) आणि मालवाहू वाहन चालक मनीष नारायण सिंग सूर्यवंशी यांना अटक केली आहे. तर सुपारी देण्यासाठी मध्यस्थी करणारा आरोपी मंगेश चौहूलकर याचा शोध पोलीस घेत आहेत.
मृतक वृषाली गावंडे या बुलढाणा जिल्ह्यातील पिंपळगाव काळे येथील जिल्हा परिषद शाळेत शिक्षिका म्हणून कार्यरत होत्या. पती प्रकाश गावंडे यांच्यासोबत त्यांचे कौटुंबिक वाद सुरू असल्याची माहिती पोलिस तपासात समोर आली आहे. या संदर्भात त्यांनी संग्रामपूर पोलीस ठाण्यात कौटुंबिक छळाची तक्रारही दिली होती.
३ मार्च रोजी घडलेल्या अपघातानंतर मृतक शिक्षिकेचा भाऊ सुमित डोसे यांनी हा अपघात नसून घातपात असल्याचा संशय व्यक्त केला. यानंतर बुलढाणा जिल्ह्यातील जळगाव जामोद पोलिसांनी तपासाची दिशा बदलत तपास अधिक वेगाने सुरू केला.
हे पण वाचा..
दारूड्या भावाच्या मित्राला “घरी जा” म्हटल्याने वाद; लहान भावाने चाकूने भोसकून मोठ्या भावाचा खून
तपासादरम्यान टाटा छोटा हत्ती मालवाहू वाहन (MH 28 BB 5753) ने वृषाली गावंडे यांच्या स्कूटरला (MH 28 AL 5815) मागून जोरदार धडक दिल्याचे समोर आले. हा अपघात नसून नियोजित कट असल्याचे पोलिसांनी स्पष्ट केले.
पोलिस तपासात असेही उघड झाले की पती प्रकाश गावंडे आणि त्याचा मित्र मंगेश चौहूलकर यांनी वाहन चालक मनीष सूर्यवंशी याला १ लाख रुपयांची सुपारी देऊन हा खून घडवून आणला.
या प्रकरणी आरोपींविरुद्ध भारतीय न्याय संहिता कलम १०६ (१), २८१ तसेच मोटार वाहन कायदा कलम १३४ व १७७ अन्वये गुन्हा दाखल करण्यात आला आहे.
हे पण वाचा..
आई-वडिलांचा एकुलता एक मुलगा गेला… सुलतानपूरमध्ये 24 वर्षीय बेरोजगार युवकाची गळफास घेऊन आत्महत्या
आरोपींना ७ मार्च रोजी न्यायालयात हजर केले असता न्यायालयाने त्यांना ९ मार्चपर्यंत पोलीस कोठडी सुनावली आहे.
सदर घटनेचा पुढील तपास पोलीस निरीक्षक नितीन पाटील यांच्या मार्गदर्शनाखाली पोलीस उपनिरीक्षक स्नेहा शेंडगे करीत आहेत. या घटनेमुळे परिसरात मोठी खळबळ उडाली आहे.
हे पण वाचा..
दिवसा घरफोडीचा प्रयत्न फसला! बीबीमध्ये शिक्षकाच्या घरात चोर रंगेहात पकडला
अधिक ताज्या आणि विश्वासार्ह बातम्यांसाठी Kattanews.in ला नियमित भेट द्या.
