बुलढाणा जिल्ह्यातील खामगाव तालुक्यातील सुटाळा बु. येथे सख्ख्या भावांमधील वादातून खून झाल्याची धक्कादायक घटना घडली आहे. दारूच्या नशेत घरी आलेल्या भावाच्या मित्राला “तुझ्या घरी जा” असे सांगितल्याने दोन भावांमध्ये वाद झाला. हा वाद इतका वाढला की संतापाच्या भरात लहान भावाने घरातील भाजी कापण्याच्या चाकूने मोठ्या भावाच्या पोटात वार करून त्याचा खून केला. ही घटना ५ मार्च रोजी दुपारी सुमारे ३ वाजताच्या सुमारास घडली असून शिवाजी नगर पोलिसांनी आरोपीला अटक केली आहे.
मिळालेल्या माहितीनुसार, सुटाळा बु. ता. खामगाव येथील देविदास महादेव गायकी (वय २८) हा ५ मार्च रोजी दुपारी आपल्या एका मित्रासह दारू पिऊन घरी आला होता. त्यावेळी देविदासचा लहान भाऊ मंगेश महादेव गायकी (वय २५) याने देविदासच्या मित्राला “तुझ्या घरी निघून जा” असे सांगितले. यावरून दोन्ही भावांमध्ये जोरदार वाद सुरू झाला.
वाद वाढत जाऊन दोघांमध्ये मारहाण झाली. या झटापटीदरम्यान देविदासने हातातील कड्याने मंगेशच्या डोक्यात मारल्याने तो जखमी झाला. त्यामुळे संतापलेल्या मंगेशने घरातील भाजी कापण्याचा चाकू आणून देविदासच्या पोटात वार केले. गंभीर जखमी झालेल्या देविदासचा घटनास्थळीच मृत्यू झाला.
घटनेची माहिती मिळताच शिवाजी नगर पोलिसांनी घटनास्थळी धाव घेत पंचनामा केला. मृतदेह शवविच्छेदनासाठी पाठवण्यात आला असून पुढील तपास सुरू आहे. या प्रकरणी मृतक देविदास यांची आई लिलाबाई गायकी यांनी दिलेल्या तक्रारीवरून आरोपी मंगेश गायकी याच्याविरुद्ध भारतीय न्यायसंहिता कलम १०३(१) व ३५२ अन्वये गुन्हा दाखल करण्यात आला आहे.
दरम्यान, राहूड ता. खामगाव येथे सुमारे १५ दिवसांपूर्वीही सख्ख्या भावाने लहान भावाचा खून केल्याची घटना घडली होती. त्यामुळे खामगाव तालुक्यात गेल्या पंधरा दिवसांत सख्ख्या भावांमधील वादातून खून होण्याची ही दुसरी घटना ठरली असून परिसरात खळबळ उडाली आहे.
हे पण वाचा..
• मेहकर MIDC परिसरात युवकाचा दगडाने ठेचून खून; प्रेमप्रकरणाची चर्चा
• बिबी येथे दिवसा घरफोडी; आरोपी रंगेहात पकडला
• मेहकर पंचायत समितीवर गंभीर आरोप; रोजगार हमी योजनेचे पैसे रखडले, सरपंच दत्ता गवईंचा उपोषणाचा इशारा
हे आवश्यक करा.
आपल्या परिसरातील ताज्या गुन्हेगारी, राजकीय व सामाजिक घडामोडींसाठी Kattanews.in नियमित वाचा आणि ही बातमी आपल्या मित्रांपर्यंत जरूर शेअर करा.
