चिखली |बुलढाणा जिल्हा |२३ फेब्रुवारी २०२६
लोणार तालुक्यातील चिखला येथे घडलेल्या घटनेनंतर संपूर्ण परिसरात संतापाची लाट उसळली असून आज दि. २३ फेब्रुवारी रोजी चिखली बंदची हाक देण्यात आली आहे. चिखला गावात छत्रपती शिवाजी महाराज यांच्या पुतळ्याला हटविण्याच्या प्रयत्नाला विरोध करणाऱ्या महिलांवर झालेल्या मारहाणीच्या घटनेचा निषेध म्हणून सर्वपक्षीय आणि शिवप्रेमी नागरिकांनी बंदचे आवाहन केले आहे.
दि. २० फेब्रुवारी रोजी सायंकाळी गावातील सरपंच आणि काही व्यक्तींनी पुतळा हटविण्याचा प्रयत्न केल्याचा आरोप करण्यात आला. यावेळी गावातील मराठा समाजातील महिला भगिनींनी विरोध दर्शविल्यानंतर त्यांच्यावर अमानुष मारहाण करण्यात आल्याचे सांगितले जात आहे. या घटनेचे पडसाद बुलढाणा जिल्ह्यासह राज्यभर उमटू लागले असून विविध स्तरांवरून संतप्त प्रतिक्रिया व्यक्त होत आहेत.
या पार्श्वभूमीवर सकल मराठा समाज व शिवप्रेमी नागरिकांच्या वतीने आज चिखली बंद पाळण्याचे आवाहन करण्यात आले आहे. या बंदमध्ये शाळा, महाविद्यालये, दवाखाने, मेडिकल व जीवनावश्यक वस्तूंची दुकाने वगळता इतर सर्व व्यावसायिक प्रतिष्ठाने बंद राहणार आहेत.
सध्या दहावी आणि बारावीच्या परीक्षा सुरू असल्याने विद्यार्थ्यांना अडचण होऊ नये म्हणून शाळा बस व शैक्षणिक वाहने सुरू ठेवण्यात येणार असल्याची माहिती आयोजकांनी दिली आहे.
शहरातील नागरिकांनी शांतता राखून कुठेही अनुचित प्रकार घडू न देता बंद पाळावा आणि घडलेल्या घटनेचा निषेध नोंदवावा, असे आवाहन सर्वपक्षीय प्रतिनिधी, चिखलीकर नागरिक आणि शिवभक्तांच्या वतीने करण्यात आले आहे.
📢 आपले मत महत्त्वाचे आहे
या घटनेबाबत आपले मत काय? खाली कमेंट करून नक्की सांगा आणि ही बातमी जास्तीत जास्त शेअर करा.
🔗 संबंधित बातम्या
