बुलढाणा | २८ जानेवारी २०२६
महिला सक्षमीकरणासाठी बचत गटांच्या माध्यमातून महिलांना प्रोत्साहन देणाऱ्या व त्यांना सहकार्य करणाऱ्या पुरुषांचा सन्मान करणारा
‘सुधारक सन्मान पुरस्कार सोहळा’ सिंदखेड राजा तालुक्यातील साखरखेर्डा येथे मोठ्या उत्साहात पार पडला.
दि. २७ जानेवारी रोजी आशीर्वाद लॉन येथे महिला आर्थिक विकास महामंडळ, जिल्हा बुलढाणा व नव तेजस्विनी महाराष्ट्र ग्रामीण महिला उद्यम विकास प्रकल्प अंतर्गत लोकसंचलित साधन केंद्र साखरखेर्डा यांच्या वतीने या कार्यक्रमाचे आयोजन करण्यात आले होते.
या कार्यक्रमाच्या अध्यक्षस्थानी नायब तहसीलदार प्रांजल पवार होत्या.
प्रमुख अतिथी म्हणून डॉ. भाग्यश्री श्रीनिवास खेडेकर, माजी सभापती वर्षाताई इंगळे,
सरपंच ज्योती जाधव, पोलीस निरीक्षक गजानन करेवाड यांची उपस्थिती होती.
यावेळी एकूण २५ जणांना सुधारक सन्मान पुरस्कार देऊन गौरविण्यात आले.
या पुरस्कारासाठी तालुक्यातील विविध गावांमधून निवड करण्यात आली होती.
मार्गदर्शन करताना नायब तहसीलदार प्रांजल पवार म्हणाल्या की,
महिलांना घर, कुटुंब आणि रोजगार अशा दुहेरी संघर्षातून पुढे जावे लागते.
तरीही महिला बचत गटांच्या माध्यमातून आर्थिकदृष्ट्या सक्षम होत आहेत, हे कौतुकास्पद आहे.
हे पण वाचा
लग्नाचे आमिष, नंतर नकार; धक्कादायक! २० वर्षीय तरुणीची आत्महत्या
डॉ. भाग्यश्री खेडेकर यांनी सांगितले की,
आज महिला प्रत्येक क्षेत्रात पुरुषांच्या बरोबरीने काम करत आहेत.
महिला कार्यक्रमात पुरुषांचा सन्मान होणे हीच खऱ्या अर्थाने महिला सक्षमीकरणाची सुरुवात आहे.
कार्यक्रमात पत्रकार अशोक इंगळे, सचिन खंडारे, समाधान सरकटे, देविदास सरकटे यांचा आयोजकांच्या वतीने सन्मान करण्यात आला.
कार्यक्रमाचे सूत्रसंचालन विद्या कळगे यांनी केले, तर आभार प्रदर्शन गोदावरी इंगळे यांनी केले.
हे पण वाचा.
राष्ट्रध्वजाला मानवंदना देतानाच शाळेच्या मुख्याध्यापकाचा मृत्यू; मोहेगाव गावावर शोककळा
👉 अधिक अशाच विश्वासार्ह व वेगवान बातम्यांसाठी Kattanews.in ला भेट द्या.
