समृद्धी महामार्गावर आयशरची कंटेनरला जोरदार धडक; ३३ वर्षीय चालकाचा जागीच मृत्यू

सिंदखेड राजा |समाधान सरकटे 

समृद्धी महामार्गावर नगरहून नागपूरच्या दिशेने जाणाऱ्या आयशर वाहनाने समोरील कंटेनरला पाठीमागून जोरदार धडक दिली. ३१ ऑगस्ट रोजी पहाटे ५ वाजण्याच्या सुमारास झालेल्या या भीषण अपघातात आयशर चालकाचा जागीच मृत्यू झाला. भागवत महादेव सानप (वय ३३, रा. राणेगाव, ता. शेवगाव, जि. नगर) असे मृत चालकाचे नाव आहे.

मिळालेल्या माहितीनुसार, OD 19 U 6157 क्रमांकाचा कंटेनर समृद्धी महामार्गावरून जात होता. दरम्यान, नगरकडून नागपूरच्या दिशेने जाणाऱ्या MH 16 CD 5252 क्रमांकाच्या आयशर वाहनाने समोरील कंटेनरला पाठीमागून जोरदार धडक दिली.

धडक इतकी जोरदार होती की, या अपघातात आयशर चालक भागवत सानप यांचा मृत्यू झाला. अपघाताची माहिती सीआरओ संभाजीनगर यांनी पहाटे फोनद्वारे पोलिसांना दिली.

माहिती मिळताच मलकापूर टीएबी अंतर्गत वाकी येथील समृद्धी महामार्ग उपकेंद्राचे एपीआय राहुल पाटील, हेड कॉन्स्टेबल देवेंद्र पायघन तसेच पोलीस कर्मचारी इरफान शेख, आकाश यादव आणि राहुल कायंदे यांनी घटनास्थळी धाव घेतली.

पोलीस पथक पहाटे ५ वाजून ३५ मिनिटांनी घटनास्थळी पोहोचले. अपघातानंतर महामार्गावरील सुरक्षिततेच्या दृष्टीने घटनास्थळी तातडीने बॅरिकेडिंग करण्यात आले. त्यानंतर क्रेनच्या साहाय्याने दोन्ही अपघातग्रस्त वाहने रस्त्याच्या बाजूला करण्यात आली.

मृत भागवत सानप यांचा मृतदेह १०८ रुग्णवाहिकेद्वारे शवविच्छेदनासाठी ग्रामीण रुग्णालय, सिंदखेड राजा येथे पाठविण्यात आला.

या प्रकरणाची नोंद सिंदखेड राजा पोलीस ठाण्यात करण्यात आली असून, पोलीस पुढील तपास आणि आवश्यक कायदेशीर कारवाई करीत आहेत.