३३ वर्षांचा शिक्षणयज्ञ पूर्ण! चालते-बोलते विद्यालय प्राचार्य अशोकराव काळुसे नियत वयोमानानुसार सेवानिवृत्त

On: January 5, 2026 9:04 AM

३३ वर्षांचा शिक्षणप्रवास पूर्ण करणारे प्राचार्य अशोकराव काळुसे सेवानिवृत्त

सिंदखेडराजा/समाधान सरकटे

३३ वर्षांच्या प्रदीर्घ सेवेनंतर प्राचार्य अशोकराव काळुसे सेवानिवृत्त झाले असून शिक्षण क्षेत्रात हा क्षण भावनिक ठरला आहे. प्राचार्य अशोकराव काळुसे सेवानिवृत्त झाल्याने हजारो विद्यार्थ्यांच्या आयुष्याला दिशा देणारा एक युगप्रवास पूर्ण झाला. प्राचार्य अशोकराव काळुसे सेवानिवृत्त होत असले तरी त्यांनी दिलेले संस्कार आयुष्यभर प्रेरणा देणारे ठरणार आहेत.

सिंदखेडराजा तालुक्यातील दरेगाव येथील शेतकरी कुटुंबात जन्मलेल्या अशोक बाबुराव काळुसे यांनी प्राथमिक शिक्षण दरेगाव येथील जिल्हा परिषद शाळेत पूर्ण केले. माध्यमिक शिक्षण सिंदखेडराजा व मेरा बु. येथील शिवाजी हायस्कूलमध्ये झाले. पुढे स्वामी विवेकानंद आश्रमातून उच्च माध्यमिक शिक्षण पूर्ण करत त्यांनी चिखली येथील शिवाजी हायस्कूलमधून पदवी घेतली.संभाजीनगर येथून बी.एड. पदवी प्राप्त करून १९९३ साली औंढरेश्वर विद्यालय, अंढेरा येथे शिक्षक म्हणून कारकिर्दीची सुरुवात केली. त्यानंतर १९९४ मध्ये भगवान बाबा शिक्षण प्रसारक मंडळ, रुम्हणा अंतर्गत शिक्षक पदावर रुजू झाले. विनाअनुदानित शाळेत सहा वर्षे कठोर परिश्रम करत शासन मान्यता मिळाल्यानंतर त्यांच्यावर मुख्याध्यापक पदाची जबाबदारी सोपवण्यात आली.

शिक्षक, मुख्याध्यापक ते प्राचार्य असा ३३ वर्षांचा प्रवास करत त्यांनी असंख्य विद्यार्थ्यांना घडवले. महाराणा प्रताप माध्यमिक व उच्च माध्यमिक विद्यालय, पास्टा (ता. व जि. जालना) येथे प्रदीर्घ सेवा बजावत ते ३१ डिसेंबर २०२५ रोजी नियत वयोमानानुसार सेवानिवृत्त झाले.

हे पण वाचा…

अखेर कारवाई! शिंदी येथील तत्कालीन ग्रामसेवक दिनकर काळे निलंबित — महिलांशी गैरवर्तन व धमकी प्रकरण.

“शाळा हे मंदिर, विद्यार्थी हे दैवत, अध्यापन ही उपासना” या मूल्यांवर ठाम विश्वास ठेवून त्यांनी शिक्षणाला केवळ नोकरी न मानता समाजघडणीचे साधन बनवले. नवनवीन तंत्रज्ञान आत्मसात करून विद्यार्थ्यांना स्पर्धात्मक युगासाठी सक्षम करण्याचे कार्य त्यांनी सातत्याने केले.

शिक्षक कधीच निवृत्त होत नाहीत— कारण त्यांनी दिलेले संस्कार पिढ्यानपिढ्या जिवंत राहतात. प्राचार्य अशोकराव काळुसे यांना त्यांच्या सेवानिवृत्तीनिमित्त मनःपूर्वक शुभेच्छा!