बुलढाणा प्रतिनिधी/भागवत गायकवाड
बुलढाणा शहरातील मुख्य बसस्थानक परिसरात ऑन ड्यूटी पोलिसावर जीवघेणा हल्ला झाल्याची खळबळजनक घटना घडली आहे.
कर्तव्यावर जात असलेल्या पोलिस कर्मचाऱ्याला भररस्त्यात अडवून बेदम मारहाण करण्यात आली.
या ऑन ड्यूटी पोलिसावर हल्ला प्रकरणामुळे नागरिकांमध्ये भीतीचे वातावरण असून पोलिसांच्या सुरक्षिततेचा गंभीर प्रश्न निर्माण झाला आहे.
धाड पोलीस स्टेशनला नेमणुकीस असलेले नारायण गजानन चाटे (वय ३७) हे शासकीय कामासाठी नागपूर हायकोर्ट येथे जाण्यासाठी
१८ डिसेंबर रोजी रात्री साडेआठच्या सुमारास बुलढाणा बसस्थानकात आले होते.
यावेळी तीन जणांच्या टोळक्याने कोणतीही शहानिशा न करता त्यांना अडवले.
‘तू लहान मुलाला का मारले?’ असा बनाव करत आरोपींनी चाटे यांची कॉलर पकडून शिवीगाळ सुरू केली.
आपण पोलिस कर्मचारी असून ड्यूटीवर जात असल्याचे सांगूनही आरोपींनी काहीही ऐकले नाही.
नशेत किंवा गुन्हेगारी वृत्तीने पिसाळलेल्या आरोपींनी लाथाबुक्क्यांनी मारहाण करत
एका बोथट हत्याराने चाटे यांच्या डोक्यावर, डोळ्याखाली व ओठावर प्रहार केला.
या हल्ल्यात ते गंभीर जखमी झाले.
या प्रकरणी बुलढाणा शहर पोलीस ठाण्यात भारतीय न्याय संहितेच्या
कलम १३२, ११८ (१), ११५, ३५२, ३५१ (२) व (३) अन्वये गुन्हा दाखल करण्यात आला आहे.
पुढील तपास सहाय्यक पोलीस निरीक्षक भरत चापाईतकर करीत आहेत.
कर्तव्यावर असलेल्या पोलिसावरच असा हल्ला झाल्याने पोलीस दलात तीव्र संताप व्यक्त होत असून
गुन्हेगारांचे मनोबल किती वाढले आहे, असा सवाल नागरिकांकडून उपस्थित केला जात आहे.
सर्वात आधी बातम्या वाचा – सत्य, वेगवान आणि निर्भीड!
हे पण वाचा…
