दोन जिवलग मित्रांचा अपघातात मृत्यू; डोणगावात एकाच वेळी अंत्यविधी

डोणगावातील लक्ष्मी नगरमध्ये राहणाऱ्या दोन जिवलग मित्रांचा भीषण अपघातात मृत्यू झाल्याने परिसरात हळहळ व्यक्त होत आहे. २ सप्टेंबरच्या रात्री नागापूर पुलाजवळ झालेल्या या अपघातात शेख साहिल शेख जफर आणि शेख शाकिब शेख शकील कुरेशी यांचा मृत्यू झाला. ३ सप्टेंबर रोजी दुपारी दोघांवर एकाच वेळी दफनविधी करण्यात आला. यावेळी असंख्य नागरिकांची गर्दी झाली होती.

मिळालेल्या माहितीनुसार, २ सप्टेंबर रोजी रात्री सुमारे ७:४५ वाजता शेख साहिल आणि शेख शाकिब हे दोघे मोटारसायकल क्रमांक टीएन ०१ ईजी १४७६ वरून मेहकरकडे जात होते. मुंबई-नागपूर राज्य महामार्गावर नागापूर पुलाजवळ ते काही कारणाने थांबले असताना मेहकरकडून भरधाव वेगाने येणाऱ्या कंटेनर क्रमांक एनएल ०१ एससी ३९८२ ने त्यांच्या मोटारसायकलला जोरदार धडक दिली.

या धडकेत दोन्ही मित्र रस्त्याच्या खाली फेकले गेले. अपघातात गंभीर जखमी झालेल्या दोघांचा जागीच मृत्यू झाल्याची माहिती आहे.

दरम्यान, मेहकरकडून डोणगावकडे येणारे अमोल धोटे आणि त्यांच्या मित्रांनी जखमींना मदत केली. त्यांनी १०८ क्रमांकावर संपर्क साधून रुग्णवाहिका बोलावली. घटनेची माहिती मिळताच डोणगाव पोलीस ठाण्याचे कर्मचारीही घटनास्थळी दाखल झाले.

या घटनेमुळे दोन्ही मित्रांच्या कुटुंबीयांवर दुःखाचा डोंगर कोसळला. ३ सप्टेंबर रोजी दुपारी सुमारे २:३० वाजता दोघांचा एकाच वेळी दफनविधी करण्यात आला. जिवलग मित्रांना एकाच वेळी अखेरचा निरोप देताना उपस्थितांचे डोळे पाणावले.

या अपघातानंतर परिसरात शोककळा पसरली असून, दोन्ही मित्रांच्या कुटुंबीयांप्रती नागरिकांकडून दुःख व्यक्त करण्यात येत आहे.