चिखली | विशाल गवई
बुलढाणा रोडवरील दांडगे पेट्रोल पंपाजवळ सोमवारी (१ जून) सायंकाळी झालेल्या भीषण अपघातात HDFC बँकेत कार्यरत असलेल्या एका तरुण अधिकाऱ्याचा जागीच मृत्यू झाला, तर त्याचा सहकारी गंभीर जखमी झाला आहे. या दुर्दैवी घटनेमुळे चिखली शहरासह परिसरात हळहळ व्यक्त होत असून अपघाताची बातमी समजताच नागरिकांनी घटनास्थळी मोठी गर्दी केली.
मिळालेल्या माहितीनुसार, अक्षय कुलसुंदर आणि गोलू गवारे हे दोघे मोटारसायकल क्रमांक एमएच-२८ बीएक्स-२७८६ वरून बुलढाण्याकडून चिखलीकडे येत होते. दरम्यान, दांडगे पेट्रोल पंपाजवळ त्यांच्या मोटारसायकलची वॅगनार कार क्रमांक एमएच-४९ बीबी-६३४६ सोबत जोरदार धडक झाली. धडक इतकी भीषण होती की मोटारसायकलचे अनेक भाग तुटून रस्त्यावर विखुरले गेले.
या अपघातात अक्षय कुलसुंदर यांचा घटनास्थळीच मृत्यू झाला. तर गोलू गवारे हे गंभीर जखमी झाले असून त्यांच्यावर छत्रपती संभाजीनगर येथील जे जे प्लस हॉस्पिटलमध्ये उपचार सुरू आहेत. दोघेही चिखली शहरातील राऊतवाडी परिसरातील रहिवासी असल्याची माहिती समोर आली आहे.
स्थानिक नागरिकांनी तातडीने मदतकार्य सुरू करत जखमीला उपचारासाठी रवाना केले. अपघाताची माहिती मिळताच चिखली पोलीस घटनास्थळी दाखल झाले. पोलिसांनी पंचनामा करून अपघाताचे कारण शोधण्यास सुरुवात केली असून पुढील कायदेशीर प्रक्रिया सुरू आहे.
दरम्यान, तरुण वयात झालेल्या या मृत्यूमुळे कुटुंबीयांवर दुःखाचा डोंगर कोसळला आहे. अक्षय कुलसुंदर यांच्या निधनाची बातमी समजताच मित्रपरिवार, नातेवाईक आणि परिसरातील नागरिकांनी शोक व्यक्त केला. चिखली शहरात या घटनेची दिवसभर चर्चा सुरू होती.
गेल्या काही दिवसांत बुलढाणा जिल्ह्यातील प्रमुख रस्त्यांवर अपघातांच्या घटनांमध्ये वाढ झाल्याचे दिसून येत आहे. त्यामुळे वाहनचालकांनी वेगावर नियंत्रण ठेवून वाहतूक नियमांचे पालन करावे, असे आवाहन प्रशासनाकडून करण्यात येत आहे.
📢 तुमच्या परिसरातील ताज्या बातम्यांसाठी Kattanews.in ला भेट द्या
बुलढाणा, चिखली, देऊळगाव राजा, सिंदखेडराजा, मलकापूर आणि जिल्ह्यातील सर्व ताज्या घडामोडी, ब्रेकिंग न्यूज, राजकीय, सामाजिक, गुन्हेगारी आणि कृषी विषयक बातम्या सर्वप्रथम वाचण्यासाठी Kattanews.in ला नियमित भेट द्या.
संबंधित बातम्या
