बुलढाणा |१४ मार्च २०२६
राज्यात दिवसेंदिवस सायबर गुन्ह्यांचे प्रमाण वाढत असताना बुलढाणा जिल्ह्यातून एक अत्यंत धक्कादायक प्रकार समोर आला आहे. एका ३५ वर्षीय विवाहित महिलेचा मोबाईल हॅक करून तिचा खासगी डेटा चोरत आरोपीने तिला ब्लॅकमेल केल्याची घटना उघडकीस आली आहे. या प्रकरणामुळे पुन्हा एकदा सायबर सुरक्षेबाबत गंभीर प्रश्न निर्माण झाले आहेत.
मिळालेल्या माहितीनुसार, आरोपी ऋषिकेश गिरी (वय २७) याने पीडित महिलेचा मोबाईल बेकायदेशीरपणे हॅक करून तिच्या व्हॉट्सअॅप चॅट, गॅलरीतील फोटो-व्हिडिओ, तसेच ई-मेलमधील माहितीवर ताबा मिळवला. त्यानंतर त्या डेटाच्या आधारे महिलेला सतत ब्लॅकमेल करण्यास सुरुवात केली.
आरोपीने महिलेला धमकी देत तिचे खासगी फोटो आणि व्हिडिओ तिच्या पतीला तसेच नातेवाईकांना पाठवून बदनाम करेल असे सांगितले. एवढ्यावरच तो थांबला नाही तर व्हिडिओ कॉल करून महिलेला विवस्त्र होण्यास भाग पाडले. या सर्व प्रकाराची स्क्रीन रेकॉर्डिंग करून आरोपीने ते व्हिडिओ पीडित महिलेच्या बहिणीलाही पाठवले असल्याची माहिती समोर आली आहे.
त्यानंतर आरोपीने महिलेला ‘तू माझ्याशी शारीरिक संबंध ठेव, नाहीतर तुला ठार मारेल’, अशी धमकी देत मानसिक छळ केला. या सततच्या त्रासाला कंटाळून पीडित महिलेनं अखेर सोनाळा पोलीस ठाण्यात तक्रार नोंदवली.
या तक्रारीच्या आधारे सोनाळा पोलिसांनी आरोपी ऋषिकेश गिरी याच्याविरुद्ध विविध कलमांखाली गुन्हा दाखल केला आहे. सध्या आरोपी फरार असून पोलिसांकडून त्याचा शोध घेण्यासाठी विशेष पथक कार्यरत करण्यात आले आहे.
दरम्यान, या घटनेमुळे बुलढाणा जिल्ह्यात खळबळ उडाली असून सायबर गुन्हेगारीबाबत नागरिकांनी अधिक सतर्क राहण्याचे आवाहन पोलिस प्रशासनाकडून करण्यात आले आहे.
Cyber Crime पासून बचावासाठी नागरिकांनी अज्ञात लिंक, संशयास्पद अॅप्स किंवा अनोळखी व्यक्तींना वैयक्तिक माहिती देणे टाळावे, तसेच मोबाईल आणि सोशल मीडिया खात्यांची सुरक्षा मजबूत ठेवावी, असेही पोलिसांनी सांगितले आहे.
Related News :
- बुलढाणा हादरलं! अवघ्या 24 तासांत 6 तरुणी बेपत्ता; 12 वीची विद्यार्थिनीही गायब
- एसटीमध्ये मेगा भरती! १७,७४२ चालक-वाहक पदांसाठी मोठी संधी; परिवहन मंत्र्यांची मोठी घोषणा
Latest Crime News आणि Maharashtra Breaking Updates साठी Kattanews.in ला भेट द्या.
