साखरखेर्डा |४ एप्रिल २०२६
बुलढाणा महसूल विभाग, नवीन महसूल कार्यालय, तहसीलदार कार्यालय या संदर्भात मोठी अपडेट समोर आली आहे. महसूल विभागाचा नवीन आकृतीबंध मंजूर करत राज्य सरकारने बुलढाणा जिल्ह्यासाठी 4 नवीन महसूल कार्यालयांना मंजुरी दिली आहे. साखरखेर्डा, डोणगाव आणि लाखनवाडा या भागांमध्ये नवीन अप्पर तहसीलदार कार्यालये सुरू होणार असल्याने नागरिकांना मोठा दिलासा मिळणार आहे. वाढत्या कामाच्या पार्श्वभूमीवर हा निर्णय अत्यंत महत्त्वाचा मानला जात आहे.
सिंदखेडराजा तालुक्यातील साखरखेर्डा, मेहकर तालुक्यातील डोणगाव आणि खामगाव तालुक्यातील लाखनवाडा येथे नवीन अप्पर तहसीलदार कार्यालये कार्यान्वित होणार आहेत. प्रत्येक कार्यालयासाठी स्वतंत्र कर्मचारीवर्ग आणि प्रशासनिक यंत्रणा उपलब्ध करून दिली जाणार आहे. यामुळे स्थानिक पातळीवरच नागरिकांची कामे पूर्ण होतील.
महसूल विभागाच्या या नव्या रचनेनुसार राज्यभरात एकूण ३४,५७६ नियमित पदे आणि १,३०० बाह्यस्त्रोत पदांची तरतूद करण्यात आली आहे. बुलढाणा जिल्ह्यासाठी १५१ नियमित पदे आणि ११ बाह्यस्त्रोत पदे मंजूर करण्यात आली आहेत. नवीन अपर जिल्हाधिकारी कार्यालयासाठी १३ पदे आणि प्रत्येक अपर तहसीलदार कार्यालयासाठी ७ पदांची मंजुरी देण्यात आली आहे.
नवीन कार्यालयांचे कार्यक्षेत्र निश्चित करताना लोकसंख्या, भौगोलिक क्षेत्र आणि तालुक्यांची संख्या यांचा विचार केला जाणार आहे. मंडळ पातळीवर विभागणी करताना कोणत्याही मंडळाचे विभाजन होणार नाही याची विशेष काळजी घेतली जाणार आहे. त्यामुळे प्रशासन अधिक व्यवस्थित आणि परिणामकारक होईल.
या निर्णयामुळे नागरिकांना जमीन नोंदणी, दाखले, महसुली प्रकरणे आणि इतर शासकीय सेवा स्थानिक स्तरावर उपलब्ध होतील. त्यामुळे जिल्ह्यातील नागरिकांचा वेळ आणि खर्च वाचणार असून शासकीय कामकाजाला मोठी गती मिळणार आहे.
👉 अशाच महत्त्वाच्या अपडेटसाठी Kattanews.in ला रोज भेट द्या
👉 तुमच्या भागातील बातम्या वाचण्यासाठी आमच्यासोबत जोडलेले रहा
