नापिकी आणि कर्जाचे संकट; अंत्री खेडेकरच्या २५ वर्षीय तरुणाची मेरा बु. शेतशिवारात आत्महत्या

कट्टा न्यूज नेटवर्क : समाधान सरकटे

सततची नापिकी आणि कर्जाची चिंता यामुळे अंत्री खेडेकर येथील २५ वर्षीय सचिन ज्ञानेश्वर भिनये यांचा मृत्यू झाला. मेरा बु. येथील शेतशिवारात झाडाला दोरीच्या साहाय्याने गळफास घेतलेल्या अवस्थेत त्यांचा मृतदेह आढळला. मंगळवार, २१ ऑक्टोबर रोजी सकाळी ही घटना उघडकीस आली. या घटनेमुळे अंत्री खेडेकर परिसरात हळहळ व्यक्त होत आहे.

अंढेरा पोलिसांकडून मिळालेल्या माहितीनुसार, अंत्री खेडेकर येथील रहिवासी सुनीता ज्ञानेश्वर भिनये यांच्या नावावर मेरा बु. शेतशिवारातील गट क्रमांक ११०९ मध्ये दीड एकर कोरडवाहू जमीन आहे. या जमिनीत त्यांनी सोयाबीनची लागवड केली होती. शेतीसाठी बँक ऑफ महाराष्ट्रच्या मेरा खुर्द शाखेतून ५० हजार रुपयांचे पीककर्ज घेतले होते.

मात्र, पावसाअभावी निर्माण झालेल्या कोरड्या दुष्काळाचा फटका सोयाबीन पिकाला बसला. त्यामुळे पिकाचे नुकसान झाले आणि कर्जाची परतफेड कशी करायची, असा प्रश्न कुटुंबासमोर निर्माण झाला होता, अशी माहिती पोलिसांकडून मिळाली आहे.

मिळालेल्या माहितीनुसार, २१ ऑक्टोबर रोजी सकाळी सचिन घरातून बाहेर पडले होते. त्यानंतर मेरा बु. शेतशिवारात ही घटना घडल्याचे समोर आले. घटनेची माहिती मिळताच गावचे पोलीस पाटील रामदास मोरे, माजी सरपंच बाळू पाटील, नाना खेडेकर, सचिन यांचे आई-वडील आणि नातेवाईक घटनास्थळी पोहोचले.

घटनेची माहिती मिळाल्यानंतर अंढेरा पोलीस ठाण्याचे प्रभारी अधिकारी रुपेश शक्करगे यांनी घटनास्थळी भेट दिली. पोलिसांनी पंचांसमक्ष पंचनामा केला असून भारतीय नागरिक सुरक्षा संहिता, २०२३ च्या कलम १९४ अन्वये नोंद करण्यात आली आहे.

नापिकी आणि कर्जाच्या समस्येमुळे ग्रामीण भागातील शेतकरी कुटुंबांसमोर निर्माण होणाऱ्या अडचणींचा प्रश्न या घटनेनिमित्त पुन्हा चर्चेत आला आहे.

कट्टा न्यूज आवाहन: आपल्या परिसरातील महत्त्वाची बातमी, नागरिकांच्या समस्या किंवा सार्वजनिक हिताची माहिती आमच्यापर्यंत पोहोचवा. सत्यापित माहिती आणि संबंधित तपशीलांसह आम्हाला संपर्क साधा.