पतंगाच्या मांजामुळे गळा चिरला; वडगाव वाणमध्ये बांधकाम मिस्त्रीला १८ टाके.

संग्रामपूर तालुक्यातील पलसीपूरा येथील रहिवासी शेख अनिस शेख गफ्फार हे बांधकाम मिस्त्री दानापूर येथे काम आटोपून आपल्या गावाकडे परतत होते. वडगाव वाण गावातून जात असताना अचानक रस्त्यावर अडकलेल्या नायलॉन मांजाने त्यांच्या गळ्याला चिरले.

गळ्याला खोल जखम झाल्याने शेख अनिस गंभीर जखमी झाले. त्यांना तातडीने वरवट बकाल येथे प्राथमिक उपचार देण्यात आले. त्यानंतर पुढील उपचारासाठी त्यांना अकोला येथे हलविण्यात आले. अकोला येथील रुग्णालयात त्यांच्यावर शस्त्रक्रिया करण्यात आली असून गळ्याच्या आतून व बाहेरून एकूण १८ टाके पडले आहेत.

नायलॉन मांजा हा केवळ माणसांसाठीच नव्हे, तर पशू आणि पक्ष्यांसाठीही अत्यंत घातक आहे. मात्र, असे असतानाही पतंग उडविण्यासाठी नायलॉन मांजाचा वापर सर्रास केला जात आहे. काही ठिकाणी कोणतीही भीती न बाळगता राजरोसपणे नायलॉन मांजाची विक्री सुरू असल्याचे चित्र आहे.

या घटनेनंतर नागरिकांमधून मांजा विक्रेत्यांविरोधात तीव्र संताप व्यक्त केला जात असून, प्रशासनाने नायलॉन मांजाविरोधात कडक कारवाई करावी, अशी मागणी होत आहे.