बुलढाणा | भागवत गायकवाड
लग्नासाठी सुंदर मुलगी दाखवतो, मात्र त्यासाठी खर्च करावा लागेल, असे आमिष दाखवून तरुणाला विवाहाच्या जाळ्यात ओढायचे आणि लग्नानंतर अवघ्या दोन दिवसांत नवरीने रोख रक्कम व ऐवज घेऊन पोबारा करायचा, असा फसवणुकीचा प्रकार बुलढाणा जिल्ह्यात उघडकीस आला आहे. धाड पोलिसांनी या विवाह फसवणूक प्रकरणाचा पर्दाफाश करत मुख्य महिला आरोपी सविता सांगळे आणि नारायण किसन आंधळे या दोघांना अटक केली आहे. विशेष म्हणजे, फरार नवरीला पकडण्यासाठी पोलिसांनी दुसऱ्या लग्नाचे आमिष दाखवत अनोखा सापळा रचला.
देऊळगाव राजा तालुक्यातील अंढेरा येथील रहिवासी नारायण किसन आंधळे याने एका तरुणाशी संपर्क साधला होता. त्याला लातूर येथील सविता अण्णा सांगळे हिचा फोटो दाखवून तिच्यासोबत विवाह लावून देण्याचा प्रस्ताव ठेवला. या विवाहाच्या मोबदल्यात दीड लाख रुपये देण्याचे ठरल्याची माहिती समोर आली आहे.
तरुणाचा विश्वास संपादन करण्यासाठी 31 ऑगस्ट 2026 रोजी दुधा येथील मर्दडी देवी संस्थानमध्ये विवाह सोहळा पार पडला. मात्र, हा विवाह पूर्वनियोजित फसवणुकीचा भाग असल्याचा आरोप आहे. लग्नानंतर अवघ्या दोन दिवसांत सविता सांगळे ही तरुणाच्या राहत्या घरातून साहित्य आणि ऐवज घेऊन पसार झाली. आपली फसवणूक झाल्याचे लक्षात येताच संबंधित तरुणाने 6 सप्टेंबर 2026 रोजी धाड पोलीस ठाण्यात तक्रार दाखल केली.
या तक्रारीवरून पोलिसांनी भारतीय न्याय संहितेच्या कलम 318(4), 61(2) आणि 3(5) अन्वये गुन्हा दाखल करून तपास सुरू केला. गुन्ह्याचे गांभीर्य लक्षात घेऊन धाडचे ठाणेदार अजिनाथ मोरे यांनी पोलीस अधीक्षक नीलेश तांबे, अपर पोलीस अधीक्षक अमोल गायकवाड आणि उपविभागीय पोलीस अधिकारी यामावर यांच्या मार्गदर्शनाखाली तपासाची सूत्रे हाती घेतली.
पोलीस अंमलदार समाधान देशमाने आणि शांताराम जाधव यांच्या मदतीने तांत्रिक तपास करण्यात आला. या तपासातून नारायण किसन आंधळे याला अंढेरा हद्दीतून ताब्यात घेण्यात आले. त्यानंतर न्यायालयाने त्याची रवानगी कारागृहात केली.
दरम्यान, या प्रकरणातील महिला आरोपी सविता सांगळे ही सतत आपले ठिकाण बदलत असल्याने तिला पकडणे पोलिसांसमोर आव्हान होते. ती परळी वैजनाथ रेल्वे स्टेशन परिसरात लपून बसल्याची गुप्त माहिती पोलिसांना मिळाली. त्यानंतर पोलिसांनी तिला फोन करून दुसऱ्या एका सधन तरुणाशी लग्न करण्याचा प्रस्ताव दिला. या विवाहासाठी दोन लाख रुपये देण्याचे आमिष दाखवण्यात आले.
पैशांच्या आमिषाला प्रतिसाद देत महिला आरोपी भेटीसाठी तयार झाली. ठरलेल्या भेटीसाठी ती आली असता 3 नोव्हेंबर 2026 रोजी छत्रपती संभाजीनगर येथून पोलिसांनी तिला ताब्यात घेतले. पोलिसांनी रचलेल्या या अनोख्या सापळ्यामुळे फरार महिला आरोपी अखेर जाळ्यात अडकली. न्यायालयाने तिचीही रवानगी कारागृहात केली आहे.
धाड पोलिसांनी केलेल्या या कारवाईमुळे लग्नाच्या नावाखाली तरुणांची फसवणूक करणाऱ्या प्रकाराचा पर्दाफाश झाला आहे. विवाहासाठी मध्यस्थामार्फत स्थळ सुचवले जात असताना संबंधित व्यक्तींची ओळख आणि पार्श्वभूमी तपासणे आवश्यक आहे. लग्नाच्या नावाखाली पैशांची मागणी करणाऱ्या अनोळखी व्यक्तींपासून नागरिकांनी सावध राहावे.
📲 बुलढाणा जिल्ह्यातील ताज्या बातम्या सर्वात आधी मिळवा!
स्थानिक घडामोडी, क्राईम न्यूज, राजकारण आणि महत्त्वाचे अपडेट्स थेट मोबाइलवर मिळवण्यासाठी KattaNews च्या WhatsApp ग्रुपमध्ये सहभागी व्हा.
📢 ही बातमी शेअर करा!
लग्नाच्या नावाखाली होणाऱ्या फसवणुकीपासून इतरांना सावध करण्यासाठी ही बातमी आपल्या मित्रपरिवार आणि नातेवाईकांसोबत शेअर करा.
📰 संबंधित बातम्या वाचा
KattaNews.in – बुलढाणा जिल्ह्यातील ताज्या आणि विश्वासार्ह बातम्या.










