राजमाता जिजाऊंना अभिवादन करून सीईओंचा जिल्हा दौरा सुरू; पदभार स्वीकारताच भालचंद्र चव्हाण यांनी सिंदखेडराजात घेतला योजनांचा आढावा!

सिंदखेडराजा, बुलढाणा : समाधान सरकटे 

बुलढाणा जिल्हा परिषदेचे मुख्य कार्यकारी अधिकारी भालचंद्र चव्हाण यांनी गुरुवारी सिंदखेडराजा येथे भेट देऊन पंचायत समितीअंतर्गत राबविण्यात येणाऱ्या विविध योजनांचा आढावा घेतला. पदभार स्वीकारल्यानंतर जिल्ह्यातील दौऱ्याची सुरुवात त्यांनी राजमाता जिजाऊ माँसाहेब यांच्या राजवाड्यात अभिवादन करून केली.

चव्हाण यांनी अतिरिक्त मुख्य कार्यकारी अधिकारी बाळासाहेब मोहन यांच्यासह राजवाड्यात जाऊन राजमाता जिजाऊंना अभिवादन केले. त्यानंतर पंचायत समितीच्या जिजाऊ सभागृहात अधिकाऱ्यांची बैठक घेण्यात आली. या बैठकीत तालुक्यातील विविध विकासकामे आणि शासकीय योजनांच्या अंमलबजावणीबाबत माहिती घेण्यात आली.

बैठकीत घरकुल योजना, समृद्ध पंचायतराज अभियान, वित्त आयोगाच्या निधीतून सुरू असलेली कामे, महात्मा गांधी राष्ट्रीय ग्रामीण रोजगार हमी योजना (मनरेगा) तसेच ग्रामपंचायतींच्या कामकाजाचा आढावा घेण्यात आला. संबंधित योजनांची सद्यस्थिती आणि सुरू असलेल्या कामांबाबत अधिकाऱ्यांकडून माहिती घेण्यात आली.

याशिवाय सिंदखेडराजा तालुक्यातील दुष्काळी परिस्थितीचीही मुख्य कार्यकारी अधिकारी भालचंद्र चव्हाण यांनी सविस्तर माहिती घेतली. ग्रामीण भागातील विकासकामे आणि विविध योजनांच्या अंमलबजावणीच्या दृष्टीने ही बैठक महत्त्वाची ठरली.

या बैठकीला प्रकल्प संचालक पांडुरंग कोल्हे, उपमुख्य कार्यकारी अधिकारी शिवशंकर भारसाकळे, गटविकास अधिकारी अजित बांगर, सौदागर पवार, जीवन राठोड, स्वप्निल निकम यांच्यासह विविध विभागांचे अधिकारी उपस्थित होते.

नाझेर काजी यांच्याकडून स्वागत

मुख्य कार्यकारी अधिकारी म्हणून पदभार स्वीकारल्यानंतर भालचंद्र चव्हाण प्रथमच सिंदखेडराजा येथे आले होते. यानिमित्त विश्रामगृहावर माजी नगराध्यक्ष तथा राष्ट्रवादी काँग्रेस (अजित पवार) पक्षाचे जिल्हाध्यक्ष अॅड. नाझेर काजी यांनी त्यांचे स्वागत केले. यावेळी जिजाऊंची प्रतिमा देऊन त्यांचा सन्मान करण्यात आला.

राजमाता जिजाऊंना अभिवादन करून जिल्हा दौऱ्याची सुरुवात करणाऱ्या सीईओ चव्हाण यांनी सिंदखेडराजा पंचायत समितीतील विविध योजनांचा आणि विकासकामांचा आढावा घेतला. या दौऱ्यादरम्यान तालुक्यातील दुष्काळी परिस्थितीची माहितीही त्यांनी जाणून घेतली.

कट्टा न्यूजला नियमित भेट द्या आणि आपल्या परिसरातील महत्त्वाच्या घडामोडी जाणून घेण्यासाठी ही बातमी इतरांसोबत शेअर करा.