पत्नीपासून दोन वर्षांपासून विभक्त… शेलगाव आटोळच्या ३५ वर्षीय तरुणाचा दुर्दैवी अंत

चिखली : विशाल गवई 

पत्नीपासून गेल्या दोन वर्षांपासून विभक्त राहणाऱ्या ३५ वर्षीय तरुणाचा दुर्दैवी मृत्यू झाल्याची घटना ३० ऑगस्ट रोजी दुपारी समोर आली. भास्कर विठ्ठल ढोले असे मृत तरुणाचे नाव आहे. ते शेलगाव आटोळ येथील रहिवासी असून, दोन मुलांसह राहत होते.

भास्कर ढोले हे गेल्या दोन वर्षांपासून पत्नीपासून वेगळे राहत होते. पत्नी सोबत नसल्याने ते मानसिक तणावात असल्याचे तक्रारीत नमूद करण्यात आले आहे. या काळात ते दारूच्या आहारी गेल्याचेही सांगण्यात आले.

रविवारी सकाळी भास्कर यांचे चुलत काका वसंता ढोले हे शेतातील कामासाठी गेले होते. त्याचदरम्यान अतुल बोडे (रा. अंचरवाडी) आणि दीपक जैन (रा. शेलगाव आटोळ) यांनी त्यांची शेतात भेट घेतली.

दोघांनी वसंता ढोले यांना भास्कर यांनी राहत्या घरी आत्महत्या केल्याची माहिती दिली. माहिती मिळताच वसंता ढोले तातडीने गावाकडे परतले.

घरी पोहोचल्यानंतर त्यांनी भास्कर यांच्या राहत्या घरी जाऊन पाहणी केली. त्यावेळी भास्कर यांचा मृत्यू झाल्याचे त्यांच्या निदर्शनास आले.

पत्नीपासून दीर्घकाळ विभक्त राहिल्यामुळे आलेल्या मानसिक तणावातून त्यांनी हे टोकाचे पाऊल उचलले असावे, असा उल्लेख तक्रारीत करण्यात आला आहे.

या घटनेने शेलगाव आटोळ परिसरात हळहळ व्यक्त होत असून, भास्कर यांच्या कुटुंबावर दुःखाचा डोंगर कोसळला आहे. घटनेची पुढील कायदेशीर प्रक्रिया संबंधित यंत्रणेकडून करण्यात आली.