कोलारा गावच्या दूषित पाण्यावर मनसे आक्रमक; BDO यांना धारेवर धरत फिल्टर प्लांटची जोरदार मागणी

चिखली :‌ विशाल गवई 

कोलारा गावातील पिण्याच्या पाण्याचा प्रश्न आता गंभीर बनला आहे. पाणी तपासणी अहवालात कोलारा आणि वसंतनगर येथील पाण्याचे नमुने दूषित आढळल्याने नागरिकांच्या आरोग्याचा प्रश्न ऐरणीवर आला आहे. सुमारे ७ ते ८ हजार लोकसंख्या असलेल्या कोलारा गावाला स्वच्छ पाणी मिळावे, यासाठी महाराष्ट्र नवनिर्माण सेनेने (मनसे) आक्रमक भूमिका घेतली असून तातडीने फिल्टर प्लांट बसवण्याची मागणी केली आहे.

पावसाळ्यात पिण्याच्या पाण्याची गुणवत्ता खालावल्याने नागरिकांच्या आरोग्याचा प्रश्न निर्माण होऊ शकतो. अशा परिस्थितीत पाणी दूषित असल्याचे समोर आल्यानंतर प्रशासनाने तातडीने उपाययोजना करणे गरजेचे आहे. याच मुद्द्यावर मनसे पदाधिकारी आणि ग्रामस्थांनी १३ ऑगस्ट रोजी प्रशासनाचे लक्ष वेधले.

मनसेच्या शिष्टमंडळाने सर्वप्रथम कोलारा ग्रामपंचायत कार्यालयाला भेट दिली. यावेळी ग्रामपंचायत सचिव झोपे मॅडम यांच्याशी गावातील दूषित पाणी, पाणी तपासणी अहवाल आणि त्यावर करण्यात येणाऱ्या उपाययोजनांबाबत चर्चा करण्यात आली.

मात्र, या गंभीर विषयाबाबत पुरेशी माहिती नसल्याचे मनसे पदाधिकाऱ्यांनी सांगितले. ग्रामपंचायत प्रशासनाच्या या भूमिकेवर नाराजी व्यक्त करत मनसे पदाधिकारी आणि ग्रामस्थांनी थेट पंचायत समिती चिखली येथे धडक दिली.

मनसे शेतकरी सेनेचे जिल्हाध्यक्ष प्रदीप भवर यांच्या नेतृत्वाखाली गटविकास अधिकाऱ्यांची भेट घेण्यात आली. यावेळी कोलारा गावातील दूषित पाण्याच्या प्रश्नावर प्रशासनाला जाब विचारण्यात आला.

दूषित पाण्यामुळे जलजन्य आजारांचा धोका निर्माण होऊ शकतो. गावातील पाणी दूषित असल्याची माहिती समोर आल्यानंतरही योग्य ती उपाययोजना होत नसेल तर नागरिकांच्या आरोग्याची जबाबदारी कोण घेणार, असा सवाल मनसे पदाधिकाऱ्यांनी उपस्थित केला.

सुमारे ७ ते ८ हजार लोकसंख्या असलेल्या कोलारा गावाला स्वच्छ आणि पिण्यायोग्य पाणी मिळणे आवश्यक आहे. त्यामुळे गावासाठी कायमस्वरूपी उपाय म्हणून तातडीने फिल्टर प्लांट बसवण्यात यावा, अशी प्रमुख मागणी मनसे आणि ग्रामस्थांच्या वतीने करण्यात आली.

दरम्यान, चिखली तालुक्यातील पाणी नमुन्यांच्या तपासणीत कोलारा आणि वसंतनगर येथील पाण्याचे नमुने दूषित आढळल्याचे सांगण्यात आले आहे. ऑगस्टच्या पहिल्या दहा दिवसांत झालेल्या तपासणीतही या गावांचे नमुने दूषित आल्याने नागरिकांच्या आरोग्याचा प्रश्न अधिक गंभीर झाला आहे.

दूषित पाण्याचा प्रश्न केवळ तात्पुरता न राहता त्यावर कायमस्वरूपी तोडगा काढावा, अशी मागणी ग्रामस्थांकडून करण्यात आली आहे. नागरिकांना सुरक्षित पाणी मिळण्यासाठी प्रशासनाने विलंब न करता आवश्यक उपाययोजना कराव्यात, अशी भूमिका मनसेने घेतली आहे.

या आंदोलनात मनसे शेतकरी सेना जिल्हाध्यक्ष प्रदीप भवर, शेतकरी संघटना जिल्हा उपाध्यक्ष भिकाजी सोळंकी, मनसे चिखली शहर अध्यक्ष नारायण बापू देशमुख, मधुकर ठेंग, ज्ञानेश्वर गायकवाड, अनिल गुंजाळकर, किशोर मघाडे, सिद्धेश्वर सोळंकी, अंकित इंगळे यांच्यासह मनसेचे पदाधिकारी, कार्यकर्ते आणि कोलारा येथील ग्रामस्थ मोठ्या संख्येने उपस्थित होते.

दरम्यान, कोलारा गावातील नागरिकांना लवकरात लवकर स्वच्छ पाणी मिळाले नाही आणि फिल्टर प्लांटबाबत योग्य निर्णय झाला नाही, तर यापेक्षाही तीव्र आंदोलन छेडण्यात येईल, असा इशारा मनसेच्या वतीने देण्यात आला आहे.