साखरखेर्ड्यात गुरुपौर्णिमा महोत्सव भक्तिभावात; श्री प्रल्हाद महाराज संस्थान व श्री पलसिद्ध महास्वामी मठात हजारो भाविकांची उपस्थिती

साखरखेर्डा | प्रा. दिलीप नाईकवाड :

बुलढाणा जिल्ह्यातील सिंदखेडराजा तालुक्यातील साखरखेर्डा येथे श्री प्रल्हाद महाराज संस्थान तसेच श्री पलसिद्ध महास्वामी मठात गुरुपौर्णिमा महोत्सव मोठ्या भक्तिभावाने आणि उत्साहपूर्ण वातावरणात संपन्न झाला. पहाटेपासूनच दोन्ही धार्मिक स्थळी दर्शनासाठी भाविकांची मोठी गर्दी झाली होती. साखरखेर्ड्यासह पंचक्रोशीतील हजारो भाविकांनी गुरुदर्शन घेत महोत्सवात उत्स्फूर्त सहभाग नोंदविला.

गुरुपौर्णिमेनिमित्त गुरुचरण पूजन, महापूजा, काकड आरती, गुरुदीक्षा, प्रवचन, भजन-कीर्तन आणि महाप्रसादासह विविध धार्मिक कार्यक्रमांचे आयोजन करण्यात आले. दिवसभर भक्तिमय वातावरणात सुरू असलेल्या कार्यक्रमांमुळे संपूर्ण परिसर अध्यात्मिक वातावरणाने भारावून गेला होता.

👉 विशेष जाहिरात | अधिक माहितीसाठी क्लिक करा

श्री पलसिद्ध महास्वामी मठाचे मठाधिपती सिद्धचैतन्य शिवाचार्य महाराज यांनी उपस्थित भाविकांना मार्गदर्शन करताना सांगितले की, “मानवाला अज्ञानातून ज्ञानाकडे नेणारा खरा मार्गदर्शक म्हणजे गुरु होय. गुरुशिवाय ज्ञानप्राप्ती होत नाही. भारतीय संस्कृतीतील गुरु-शिष्य परंपरा ही जगाला दिशा देणारी परंपरा आहे.” व्यासमुनींनी वेदांचे संकलन करून ज्ञानाचा प्रकाश सर्वदूर पोहोचविला. त्यामुळे गुरुपौर्णिमेला ‘व्यासपौर्णिमा’ असेही संबोधले जाते, असे त्यांनी स्पष्ट केले.

श्री प्रल्हाद महाराज संस्थानात सकाळी महापूजा, काकड आरती, गुरुचरण पूजन व विविध धार्मिक विधी पार पडले. त्यानंतर भाविकांनी श्रींचे दर्शन घेऊन आशीर्वाद घेतले. संस्थानच्या वतीने भाविकांसाठी महाप्रसादाची व्यवस्था करण्यात आली होती. यावेळी गुणवंत विद्यार्थी, सेवाभावी व्यक्ती तसेच विविध क्षेत्रात उल्लेखनीय कार्य करणाऱ्या भक्तांचा सत्कार करण्यात आला.

गुरुपौर्णिमेनिमित्त श्री पलसिद्ध महास्वामी मठ आणि श्री प्रल्हाद महाराज संस्थान या दोन्ही ठिकाणी दिवसभर भाविकांची मोठी गर्दी होती. वाढती गर्दी लक्षात घेऊन वाहतूक आणि पार्किंगची विशेष व्यवस्था करण्यात आली होती. पोलिस प्रशासनाच्या वतीने चोख बंदोबस्त ठेवण्यात आल्याने सर्व धार्मिक कार्यक्रम शांततेत आणि सुरळीतपणे पार पडले.

श्रद्धा, भक्ती, गुरुसेवा आणि आध्यात्मिक विचारांचा संदेश देणारा साखरखेर्ड्यातील गुरुपौर्णिमा महोत्सव भाविकांसाठी प्रेरणादायी ठरला. हजारो भाविकांच्या उपस्थितीमुळे संपूर्ण परिसर दिवसभर भक्तिरसात न्हाऊन निघाला.