देऊळगाव राजा|१२ एप्रिल २०२६
देऊळगावराजा तालुक्यातील दगडवाडी येथे शुक्रवारी (10 एप्रिल) मध्यरात्री शॉर्टसर्किटमुळे भीषण आग लागली. या आगीत गॅस सिलेंडरचा जबरदस्त स्फोट झाल्याने परिसर हादरला. घटनेत 7 जण जखमी झाले असून लाखोंचे नुकसान झाल्याची माहिती समोर आली आहे. घरात कोणी नसल्याने मोठी जीवितहानी टळली, मात्र संपूर्ण परिसरात भीतीचे वातावरण निर्माण झाले.
मिळालेल्या माहितीनुसार, कारभारी दीपाजी नागरे यांच्या घराला मध्यरात्री अचानक आग लागली. शेजारी राहणारे सौंदा उगलमुगले यांनी घरातून धूर व ज्वाळा पाहून तत्काळ शेजाऱ्यांना सतर्क केले आणि सरपंचांशी संपर्क साधला. सरपंच पतींनी तातडीने पोलीस निरीक्षक ब्रह्मगिरी यांना माहिती देत अग्निशामक दलाला बोलावले.
गावकऱ्यांनी सुरुवातीला स्वतःच्या परीने पाण्याच्या बाटल्यांनी आग विझवण्याचा प्रयत्न केला. मात्र आग वाढत असतानाच घरातील गॅस सिलेंडरचा प्रचंड स्फोट झाला. स्फोटाच्या तीव्रतेने घरावरील पत्रे व मोठे दगड दूरवर उडाले. स्फोटाचा आवाज संपूर्ण गावात घुमला आणि ग्रामस्थांमध्ये भीतीचे वातावरण पसरले.
या घटनेत आर्यन शंकर घुगे यांच्या डोक्याला गंभीर दुखापत झाली असून त्यांना 18 टाके घालावे लागले. इतर काही जण किरकोळ जखमी झाले. काहींना टिनपत्र व दगड लागल्याने दुखापत झाली.
घटनास्थळी 15–20 मिनिटांत अग्निशामक दल दाखल झाले. अग्निशामक कर्मचारी, पोलीस आणि गावकऱ्यांच्या संयुक्त प्रयत्नांनी आग आटोक्यात आणली. परिसरातील इतर घरांना आग लागण्याचा मोठा धोका होता, मात्र वेळीच उपाययोजना झाल्याने मोठा अनर्थ टळला.
या आगीत घरातील धान्य, महत्त्वाची कागदपत्रे, घरगुती साहित्य तसेच छतावरील सामान जळून खाक झाले असून लाखो रुपयांचे नुकसान झाले आहे.
ही बातमी जास्तीत जास्त लोकांपर्यंत पोहोचवण्यासाठी शेअर करा.
