बुलढाणा |८ मार्च २०२६
जिल्ह्यातील चिखली तालुक्यातील उत्राडा गावात जलजीवन योजनेअंतर्गत सुरू असलेल्या पाणीपुरवठा योजनेच्या कामाबाबत गंभीर आरोप करण्यात आले आहेत. गावात बांधण्यात येत असलेल्या पाण्याच्या टाकीचे व पाईपलाईनचे काम निकृष्ट दर्जाचे असल्याचा आरोप स्थानिक पत्रकारांनी केला असून या कामाची सखोल चौकशी व्हावी, यासाठी 20 मार्च 2026 पासून जिल्हाधिकारी कार्यालयासमोर आमरण उपोषणास बसण्याचा इशारा देण्यात आला आहे.
याबाबत विशाल मधुकर गवई, फारुख युसूफ शेख आणि राजिक गफ्फार शेख या पत्रकारांनी जिल्हाधिकारी बुलढाणा यांना लेखी निवेदन दिले आहे. या निवेदनात नमूद केल्याप्रमाणे, 5 फेब्रुवारी 2026 रोजी उत्राडा गावातील ग्रामीण पाणीपुरवठा योजनेच्या कामाबाबत निकृष्ट दर्जाची तक्रार दाखल करण्यात आली होती.
👉 विशेष जाहिरात | अधिक माहितीसाठी क्लिक करा
यानंतर 13 फेब्रुवारी 2026 रोजी ग्रामीण पाणीपुरवठा उपविभाग चिखली यांनी दिलेल्या पत्रात विहिरीचे बांधकाम तांत्रिकदृष्ट्या योग्य असल्याचे सांगण्यात आले. तसेच विहिरीपासून पाण्याच्या टाकीपर्यंत 90 मिमी व्यासाची एचडीपीई पाईपलाईन व 2115 मीटर लांबीचे काम करण्यात आल्याचे नमूद करण्यात आले आहे.
मात्र या उत्तरावर समाधान न झाल्याने आणि प्रशासनाकडून उडवाउडवीची उत्तरे दिली जात असल्याचा आरोप करत पत्रकारांनी या संपूर्ण कामाची निष्पक्ष चौकशी व्हावी अशी मागणी केली आहे. पाण्याच्या टाकीच्या बांधकामाबाबत तसेच पाईपलाईनच्या गुणवत्तेबाबत अनेक शंका उपस्थित करण्यात आल्या आहेत.
यासंदर्भात पत्रकारांनी जिल्हाधिकारी कार्यालयासमोर 20 मार्च 2026 पासून आमरण उपोषणास बसण्याचा निर्णय घेतला आहे. या काळात कोणतीही अनुचित घटना घडल्यास त्याची संपूर्ण जबाबदारी जिल्हा प्रशासन आणि संबंधित कंत्राटदारावर राहील, असेही निवेदनात नमूद करण्यात आले आहे.
या निवेदनाच्या प्रती ग्रामीण पाणीपुरवठा मंत्री गुलाबराव पाटील, राज्यमंत्री मेघना बोर्डीकर, जिल्हा परिषद बुलढाणा, ग्रामीण पाणीपुरवठा विभाग तसेच पोलीस प्रशासनाला देखील पाठविण्यात आल्या आहेत. त्यामुळे या प्रकरणाकडे प्रशासन कसे लक्ष देते आणि चौकशीचे पाऊल उचलते का याकडे आता सर्वांचे लक्ष लागले आहे.
Related News
- मेहकर MIDC परिसरात युवकाचा दगडाने ठेचून खून; प्रेमप्रकरणाची चर्चा
- बिबी येथे दिवसा घरफोडी; आरोपीस रंगेहात अटक
- मेहकर पंचायत समितीवर गंभीर आरोप; रोजगार हमी योजनेचे पैसे रखडले, सरपंच दत्ता गवईंचा उपोषणाचा इशारा
Join Kattanews.in — आपल्या परिसरातील ताज्या आणि विश्वासार्ह बातम्यांसाठी आमच्या वेबसाईटला नियमित भेट द्या.
