Advertisement
रिसोड ,वाशिम|१२ फेब्रुवारी २०२६
येवती ग्रामपंचायत, सरपंच अपात्रता, महाराष्ट्र ग्रामपंचायत अधिनियम 1959 कलम 39(1) या प्रकरणामुळे वाशिम जिल्ह्यात मोठी राजकीय खळबळ उडाली आहे. अपर आयुक्त, अमरावती यांनी दि. 6 फेब्रुवारी 2026 रोजी दिलेल्या आदेशानुसार सरपंच सौ. योगिता गजानन माळेकर यांना थेट अपात्र घोषित करण्यात आले आहे. या निर्णयामुळे त्यांचे सरपंचपद तसेच ग्रामपंचायत सदस्यत्व तात्काळ रद्द झाले असून येवती गावातील राजकीय वातावरण ढवळून निघाले आहे.हे प्रकरण श्रीकृष्ण निलोबा शिंदे (रा. येवती) यांनी दाखल केलेल्या तक्रारीवरून सुरू झाले. तक्रारीनुसार ग्रामसभेचा आवश्यक कोरम पूर्ण नसतानाही सभा पार पाडण्यात आली. अनुपस्थित सदस्यांना उपस्थित तसेच ‘सूचक’ म्हणून नोंदविण्यात आले. मासिक बैठकीच्या इतिवृत्तात गैरहजर व्यक्तीचे नाव प्रस्तावक व समर्थक म्हणून नमूद करण्यात आल्याचा आरोप करण्यात आला.महात्मा गांधी राष्ट्रीय ग्रामीण रोजगार हमी योजनेअंतर्गत प्रत्यक्षात विहीर न खोदता मजुरी अदा करण्यात आल्याचेही तक्रारीत नमूद करण्यात आले. संबंधित हजेरीपत्रकास मान्यता देऊन आर्थिक लाभ मिळवून दिल्याचेही आरोप करण्यात आले होते.मुख्य कार्यकारी अधिकारी, जिल्हा परिषद वाशिम यांनी सादर केलेल्या चौकशी अहवालात ग्रामसभेचा कोरम अपूर्ण असल्याचे स्पष्ट झाले. तहकूब सभेची कालमर्यादा पाळली नसल्याचेही निदर्शनास आले. प्रत्यक्षात विहीर अस्तित्वात नसताना हजेरीपत्रकास मान्यता देण्यात आल्याचे नमूद करण्यात आले असून सरपंचांनी कर्तव्यात गंभीर कसूर केल्याचे स्पष्ट मत नोंदविण्यात आले.
सुनावणीदरम्यान चौकशी अहवाल त्रिसदस्यीय असल्याने तो अवैध असल्याचा युक्तिवाद करण्यात आला. मात्र उपलब्ध दस्तऐवज, नोंदी व पुराव्यांचा अभ्यास करून अपर आयुक्तांनी हा युक्तिवाद नामंजूर केला.
महाराष्ट्र ग्रामपंचायत अधिनियम 1959 च्या कलम 39(1) अंतर्गत पदाचा दुरुपयोग व नियमभंग झाल्याचे स्पष्ट झाल्याने सौ. योगिता गजानन माळेकर यांना सरपंच व सदस्य पदासाठी अपात्र घोषित करण्यात आले.
या आदेशामुळे येवती ग्रामपंचायतीत राजकीय हालचालींना वेग आला असून पुढील कायदेशीर पर्यायांचा अवलंब केला जाणार का, याकडे संपूर्ण तालुक्याचे लक्ष लागले आहे.
हे पण वाचा.
👉 स्थानिक, राजकीय आणि विश्वसनीय बातम्यांसाठी kattanews.in नियमित वाचा आणि Follow करा.
