चिखली |२ एप्रिल २०२६
करवंड गढी, शिवकालीन ग्रामोत्सव, शिवप्रेमी आणि श्रमदान या सर्वांचा संगम घडवणारा भव्य ऐतिहासिक सोहळा 15 व 16 एप्रिल 2026 रोजी करवंड येथे पार पडणार आहे. करवंड गढीवर पुन्हा एकदा शिवकालीन वैभव उजळणार असून 250 हून अधिक शिवप्रेमींच्या श्रमदानातून गढी परिसर नव्याने सज्ज करण्यात आला आहे.
चिखली तालुक्यातील ऐतिहासिक परंपरा लाभलेल्या करवंड नगरीत हा भव्य ‘ऐतिहासिक ग्रामोत्सव’ साजरा होत आहे. विशेष म्हणजे करवंड हे गाव छत्रपती शिवाजी महाराजांची सासुरवाडी म्हणून ओळखले जाते, त्यामुळे या उत्सवाला ऐतिहासिक महत्त्व प्राप्त झाले आहे.
गेल्या काही दिवसांपासून गावातील युवकांनी कोणत्याही कंत्राटदाराची वाट न पाहता स्वतः पुढाकार घेत श्रमदानातून मंदिर परिसराचे नूतनीकरण केले. मंदिराच्या पायऱ्यांची दुरुस्ती, प्राचीन बारव स्वच्छता आणि सुशोभीकरण करण्यात आले. या कार्यामुळे पंचक्रोशीतील शिवप्रेमी मोठ्या संख्येने सहभागी झाले.
या उपक्रमाला शिवकालीन सरदार घराण्याचे वंशज श्रीमंत रुद्रप्रताप सिंगजी इंगळे यांच्या उपस्थितीने विशेष ऊर्जा मिळाली. त्यांनी स्वतः श्रमदान करून सुमारे 250 शिवप्रेमींना प्रेरित केले.
या ऐतिहासिक ग्रामोत्सवाला सातारा गादीचे वारसदार आणि छत्रपती शिवाजी महाराजांचे 13 वे वंशज श्रीमंत शिवेंद्रसिंहराजे भोसले उपस्थित राहणार असून, विविध सरदार घराण्यांचे वंशजही सहभागी होणार आहेत.
गढी स्वच्छता अभियानात ‘श्री शिवप्रतिष्ठान हिंदुस्थान’, ‘सेव्ह रिव्हर’ संस्था, स्थानिक धारकरी आणि शेकडो शिवभक्तांनी सक्रिय सहभाग घेतला. या सर्वांच्या एकत्रित प्रयत्नातून गढी परिसर उत्सवासाठी सज्ज झाला आहे.
स्थानिक युवकांनी सांगितले की, शासकीय निधीमुळे या उपक्रमाला गती मिळाली असली तरी हा उत्सव लोकसहभागातून उभा राहणारा ‘ग्रामोत्सव’ आहे. इतिहास जतन करण्यासाठी आणि पुढील पिढ्यांना प्रेरणा देण्यासाठी हा प्रयत्न महत्त्वाचा आहे.
या ग्रामोत्सवात ऐतिहासिक गढी, नव्याने साकारलेले शिवमंदिर आणि प्राचीन बारव ही प्रमुख आकर्षणे ठरणार आहेत. करवंड नगरीतील हा उपक्रम शिवकालीन परंपरेचा अभिमान जागवणारा ठरत आहे.
📢 Related News
- पोलीस होण्याचं स्वप्न… पण तिसऱ्याच फेरीत आयुष्य संपलं; पुण्यात भरतीदरम्यान देऊळगाव राजातील तरुणाचा मृत्यू
- धक्कादायक! ९२ वर्षांच्या आजीला चाकूचा धाक दाखवून १३ लाखांची लूट; ३ महिन्यांपासून फरार ‘बाली’ अखेर अटकेत
👉 Call To Action
अशाच ताज्या, विश्वसनीय आणि व्हायरल बातम्यांसाठी Kattanews.in ला दररोज भेट द्या. तुमच्या भागातील बातमी आम्हाला पाठवा आणि आमच्या प्लॅटफॉर्मवर प्रसिद्ध करा.
