Beed latest news : शेतात खुरपणी करत असताना अचानक वादळ वारे आले. सोबतच विजांचा कडकडाट झाला. यामध्ये एक वीज अंगावर कोसळल्याने चार महिला भाजल्या. त्यातील तीन महिलांचा जिल्हा रुग्णालयात नेत असताना मृत्यू झाला, तर भाजलेल्या एका महिलेवर उपचार सुरू आहेत. ही घटना ‘गेवराई तालुक्यातील चकलांबा’ येथे बुधवारी सायंकाळी घडली.
शालनबाई शेषेराव नजन (वय ६५), लंका हरिभाऊ नजन (वय ४५) आणि विजया राधाकिसन खेडकर (वय ४६, सर्व रा. चकलांबा ता. गेवराई), अशी मयत महिलांची नावे आहेत. यमुना माणिक खेडकर (वय ७५) या भाजल्या असून त्यांच्यावर उपचार सुरू आहेत. या सर्व महिला हरिभाऊ नजन यांच्या शेतात बुधवारी खुरपणी करण्यासाठी गेल्या होत्या. सायंकाळच्या सुमारास शेतात असलेल्या या चार महिलांच्या अंगावर वीज कोसळली. या सर्वांना जिल्हा रुग्णालयात हलविले; परंतु बीडमध्ये beed येईपर्यंतच तीन महिलांचा मृत्यू झाला, तर भाजलेल्या यमुना खेडकर यांच्यावर जिल्हा रुग्णालयात उपचार सुरू आहेत.
नातेवाइकांचा आक्रोश
* घटनेची माहिती मिळताच मयतांच्या कुटुंबीयांसह नातेवाईक, चकलांबा ग्रामस्थांनी जिल्हा रुग्णालयात धाव घेतली.
एकाचवेळी तीन महिलांचा मृत्यू झाल्याने नातेवाइकांनी आक्रोश केला.
* यावेळी जिल्हा रुग्णालय परिसरात मोठी गर्दी जमा झाली होती.
