देऊळगाव राजा | मनोहर खंदारे
देऊळगाव राजा तालुक्यात गोवंश तस्करीचा प्रयत्न देऊळगाव राजा पोलिसांनी मध्यरात्री उधळून लावला. देऊळगावमही ते खैरव रोडवर पहाटेच्या सुमारास पोलिसांनी मोठी कारवाई करत सहा वाहने अडवली. या वाहनांमधून तब्बल ४४ गोवंश जनावरांची सुटका करण्यात आली. या कारवाईत सहा वाहने आणि जनावरांसह एकूण ४८ लाख ८० हजार रुपयांचा मुद्देमाल जप्त करण्यात आला आहे. याप्रकरणी सहा जणांविरुद्ध गुन्हा दाखल करण्यात आला आहे.
मिळालेल्या माहितीनुसार, १९ नोव्हेंबर २०२६ रोजी पहाटे सुमारे २.१५ वाजता देऊळगाव राजा पोलीस गस्तीवर असताना देऊळगावमही ते खैरव रोडवरून सहा वाहने संशयास्पदरीत्या जाताना दिसली. पोलिसांनी तत्काळ ही वाहने थांबवून तपासणी केली. यावेळी वाहनांमध्ये ४४ गोवंश जनावरे अत्यंत दाटीवाटीने आणि निर्दयतेने कोंबून वाहतूक केली जात असल्याचे आढळून आले.
वाहतुकीदरम्यान जनावरांना चारा-पाण्याची व्यवस्था करण्यात आली नसल्याचेही समोर आले. तसेच जनावरांची वाहतूक करण्यासाठी आवश्यक परवाने आरोपींकडे नसल्याचे तपासणीत उघड झाले. त्यानंतर पोलिसांनी सर्व सहा वाहने ताब्यात घेऊन ४४ गोवंश जनावरांची सुटका केली.
या कारवाईत जप्त करण्यात आलेल्या मुद्देमालामध्ये ४४ गोवंश जनावरांची किंमत ८ लाख ८० हजार रुपये, तर सहा वाहनांची किंमत ४० लाख रुपये आहे. अशा प्रकारे एकूण ४८ लाख ८० हजार रुपयांचा मुद्देमाल पोलिसांनी हस्तगत केला आहे.
सुटका करण्यात आलेल्या सर्व जनावरांना सुरक्षित ठिकाणी हलविण्यात आले असून, त्यांच्या चारा-पाण्याची व्यवस्था करण्यात आली आहे. तसेच जनावरांची वैद्यकीय तपासणी करण्याची व्यवस्था करण्यात आली आहे.
या प्रकरणी आरोपींविरुद्ध महाराष्ट्र प्राणी संरक्षण कायदा तसेच प्राण्यांप्रती क्रूरता प्रतिबंधक कायद्यान्वये गुन्हा दाखल करण्यात आला आहे. ही जनावरे नेमकी कुठून आणण्यात आली होती, त्यांना कुठे नेले जात होते आणि या प्रकरणामागे आणखी कोणाचा सहभाग आहे का, या दिशेने देऊळगाव राजा पोलीस तपास करीत आहेत.
देऊळगावमही-खैरव रोडवर मध्यरात्री करण्यात आलेल्या या कारवाईमुळे परिसरातील गोवंश तस्करीचा मुद्दा पुन्हा चर्चेत आला आहे. ४४ जनावरांची सुटका आणि लाखोंचा मुद्देमाल जप्त झाल्याने या कारवाईची तालुक्यात चर्चा सुरू आहे.
📲 बुलढाणा जिल्ह्यातील ताज्या बातम्या सर्वप्रथम मोबाईलवर मिळवण्यासाठी आमच्या WhatsApp ग्रुपमध्ये सहभागी व्हा.
✅ WhatsApp ग्रुपमध्ये सहभागी व्हा
वाचकांसाठी आवाहन : आपल्या परिसरातील महत्त्वाच्या बातम्या, स्थानिक समस्या आणि घडामोडींची माहिती KattaNews पर्यंत पोहोचवा. बातमी किंवा माहिती पाठवण्यासाठी आमच्याशी संपर्क साधा.
कट्टा न्यूज – आपल्या परिसराचा आवाज!
हेही वाचा :










