म्हातारपणी ज्या मुलाकडून आधाराची अपेक्षा होती, त्याच मुलाने बकरीच्या पैशांवरून घेतला वडिलांचा जीव

चिखली : विशाल गवई 

ज्या मुलाकडून आयुष्याच्या अखेरच्या टप्प्यात आधाराची अपेक्षा होती, त्याच मुलाच्या हातून जन्मदात्या वडिलांचा जीव गेल्याची धक्कादायक घटना नायगाव बु. येथे घडली. बकरी विक्रीचे पैसे मागण्यावरून वडील आणि मुलामध्ये वाद झाला. या वादातून मुलाने वडिलांना लाथाबुक्क्यांनी मारहाण केल्याचा आरोप आहे. त्यानंतर लोखंडी फुकणीनेही मारहाण करण्यात आली. गंभीर जखमी झालेल्या वडिलांचा उपचारादरम्यान मृत्यू झाला. या घटनेने परिसरात हळहळ व्यक्त होत असून, गायकवाड कुटुंबावर दुःखाचा डोंगर कोसळला आहे.

मंगरुळ नवघरे येथील नायगाव बु. येथे २९ ऑगस्टच्या रात्री ही घटना घडली. मृतक कचरुबा वामन गायकवाड (वय ६०) हे पत्नी बेबीबाई (वय ५५) आणि कुटुंबीयांसह राहत होते. त्यांना एक मुलगा आणि चार मुली आहेत.

पोलिसांनी दिलेल्या माहितीनुसार, शनिवारी रात्री सुमारे ११ वाजण्याच्या सुमारास कचरुबा गायकवाड यांनी त्यांचा मुलगा विनोद कचरुबा गायकवाड (वय ३८) याच्याकडे बकरी विक्रीचे पैसे मागितले. यावरून दोघांमध्ये वाद झाला.

वाद वाढल्यानंतर विनोद याने वडिलांना शिवीगाळ करून लाथाबुक्क्यांनी मारहाण केल्याचे पोलिसांत दाखल तक्रारीत नमूद आहे. त्यानंतर लोखंडी फुकणीने त्यांच्या पोटावर, छातीवर आणि डोक्यावर मारहाण करण्यात आल्याचेही फिर्यादीत म्हटले आहे.

मारहाणीत कचरुबा गायकवाड गंभीर जखमी झाले. त्यांना उपचारासाठी दवाखान्यात दाखल करण्यात आले. मात्र उपचार सुरू असतानाच त्यांचा मृत्यू झाला.

वडील आणि मुलामधील बकरी विक्रीच्या पैशांवरून सुरू झालेला वाद एवढ्या टोकाला जाईल, याची कल्पनाही कुटुंबीयांना नव्हती. या घटनेनंतर गायकवाड कुटुंबावर दुःखाचा डोंगर कोसळला आहे. चार मुलींच्या डोक्यावरचे पित्याचे छत्र हरपल्याने कुटुंबीयांवर शोककळा पसरली आहे.

घटनेची माहिती मिळताच अमडापूर पोलिसांनी घटनास्थळी धाव घेतली. मृतकाची पत्नी बेबीबाई कचरुबा गायकवाड यांच्या फिर्यादीवरून आरोपी विनोद गायकवाड याच्याविरुद्ध अमडापूर पोलिस ठाण्यात भारतीय न्याय संहिता २०२३ मधील कलम १०३(१), ३५१(२) आणि ३५२ अन्वये गुन्हा दाखल करण्यात आला आहे.

गुन्हा दाखल होताच अमडापूर पोलिसांनी आरोपी विनोद गायकवाड याला अटक केली. या प्रकरणाचा पुढील तपास ठाणेदार जयसिंग राजपूत यांच्या मार्गदर्शनाखाली पोलीस उपनिरीक्षक बालाजी सानप आणि रायटर प्रदीप चोपडे करीत आहेत.

महत्त्वाचे: घटनेतील आरोप आणि पोलिस तपासातील बाबी न्यायालयीन प्रक्रियेच्या अधीन आहेत. प्रकरणाचा पुढील तपास सुरू आहे.