समाधान सरकटे|प्रतिनिधी
बुलढाणा जिल्ह्यातील राजुरा हत्याकांड प्रकरणाने पुन्हा एकदा नवे आणि नाट्यमय वळण घेतले आहे. सुमारे सव्वा महिन्यापूर्वी राजुरा शिवारात सापडलेल्या धड व मुंडक्याची ओळख अद्याप पटलेली नसताना तपासासाठी दफन करण्यात आलेला मृतदेह पुन्हा बाहेर काढण्यात आल्याने संपूर्ण परिसरात खळबळ उडाली आहे. या घटनेमुळे तपासाच्या दिशेबाबत नव्याने चर्चा सुरू झाली असून नागरिकांमध्येही उत्सुकता वाढली आहे.
मंगळवारी या प्रकरणात महत्त्वपूर्ण हालचाल दिसून आली. विशेष पोलीस महानिरीक्षक महेश पाटील आणि जिल्हा पोलीस अधीक्षक निलेश तांबे यांनी स्वतः घटनास्थळी भेट देत तपासाचा सविस्तर आढावा घेतला. त्यांनी राजुरा शिवारातील घटनास्थळाची पाहणी केल्यानंतर वाडी खुर्द येथील स्मशानभूमीत जाऊन दफन केलेला मृतदेह पुन्हा बाहेर काढण्याच्या प्रक्रियेवर देखरेख ठेवली.
👉 विशेष जाहिरात | अधिक माहितीसाठी क्लिक करा
फॉरेन्सिक तज्ज्ञांच्या उपस्थितीत मृतदेहाची पुन्हा तपासणी करण्यात आली. यापूर्वीच मृतदेहाचे नमुने प्रयोगशाळेत पाठविण्यात आले होते. मात्र त्यानंतरही मृतदेह पुन्हा बाहेर काढून तपासणी का करण्यात आली, याबाबत अधिकृत माहिती समोर आलेली नसल्याने नागरिकांमध्ये विविध चर्चांना उधाण आले आहे.
मृतदेह बाहेर काढण्यासाठी जेसीबी मशीनचा वापर करण्यात आला. या प्रक्रियेदरम्यान परिसरात दुर्गंधी पसरल्याने काही काळ तणावाचे वातावरण निर्माण झाले होते. पोलीस प्रशासनाने कडेकोट बंदोबस्त ठेवत संपूर्ण कारवाई शांततेत पार पाडली. उपविभागीय पोलीस अधिकारी आनंद महाजन, संतोष खाडे तसेच ठाणेदार सचिन बागुल यांच्या उपस्थितीत ही प्रक्रिया पूर्ण करण्यात आली.
दरम्यान, या हत्याकांडाच्या तपासात कथित त्रुटी झाल्याचा आरोप काही स्तरांतून करण्यात येत आहे. त्यामुळे तपासाच्या सुरुवातीच्या टप्प्यातील कार्यपद्धतीवर प्रश्नचिन्ह उपस्थित केले जात असून वरिष्ठ अधिकाऱ्यांवरही कारवाई करण्याची मागणी राजकीय स्तरावरून पुढे येत आहे.
या प्रकरणातील सर्वात मोठे गूढ म्हणजे सापडलेल्या धड आणि मुंडक्याची ओळख अद्याप निश्चित झालेली नाही. त्यामुळे तपास यंत्रणांसमोर मोठे आव्हान उभे राहिले आहे. फॉरेन्सिक तपासणीमधून मिळणाऱ्या अहवालावर या प्रकरणातील पुढील दिशा अवलंबून असल्याचे मानले जात आहे.
विशेष पोलीस महानिरीक्षकांनी घटनास्थळाची पाहणी करून तपास अधिक प्रभावीपणे करण्याच्या सूचना दिल्या आहेत. त्यांच्या निर्देशांनुसार तपास अधिक वेगाने पुढे सरकण्याची शक्यता व्यक्त होत आहे. आता या हत्याकांडाचा उलगडा कधी होणार, मृत व्यक्तीची ओळख कशी पटणार आणि या प्रकरणात आणखी कोणते धक्कादायक खुलासे होणार, याकडे संपूर्ण जिल्ह्याचे लक्ष लागले आहे.
“विशेष पोलीस महानिरीक्षकांनी घटनास्थळी भेट देऊन तपासाचा आढावा घेतला आहे. त्यांच्या निर्देशानुसार तपास सुरू असून फॉरेन्सिक तज्ज्ञांच्या मदतीने मृतदेहाची तपासणी करण्यात आली आहे.”
— संतोष खाडे, तपास अधिकारी तथा डिवायएसपी, मेहकर
वाचकांसाठी महत्त्वाचे
राजुरा हत्याकांड प्रकरणातील प्रत्येक महत्त्वपूर्ण अपडेट, बुलढाणा जिल्ह्यातील ताज्या घडामोडी, गुन्हे, राजकारण, शेती, रोजगार आणि ब्रेकिंग न्यूज सर्वात आधी मिळवण्यासाठी Kattanews.in ला नियमित भेट द्या.
Related News
