साखरखेर्डा |१६ मार्च २०२६
येथून जवळच असलेल्या मोहाडी शिवारात मागील चार दिवसांपासून बिबट्याच्या वावरामुळे परिसरातील शेतकरी वर्गात भीतीचे वातावरण निर्माण झाले आहे. १५ मार्च रोजी सकाळी सुमारे १० वाजता बिबट्याने एका नीलगाईवर (रोही) हल्ला करून तिला जखमी केल्याची घटना घडली.
नीलगाईचा मोठ्याने ओरडण्याचा आवाज ऐकून शेतात काम करीत असलेले शेतकरी गजानन बबन इंगळे आणि माजी सैनिक पुंजाजी इंगळे धावत गेले. तेव्हा एक मादी बिबट्या आणि तिची दोन पिल्ले यांनी नीलगाईवर हल्ला करून तिला जखमी केलेले त्यांनी पाहिले. बिबट्याने नीलगाईला जबड्यात पकडून ठेवले होते.
👉 विशेष जाहिरात | अधिक माहितीसाठी क्लिक करा
चार दिवसांपूर्वीही मोहाडी गावाजवळील तलाव परिसरात बिबट्याचा वावर दिसून आला होता. शेतकऱ्यांनी लाठ्या-काठ्या घेऊन त्याचा पाठलाग करून त्याला हाकलून लावले होते. उन्हाळा सुरू झाल्यामुळे अनेक ठिकाणी पाण्याचे साठे कमी होत असताना मोहाडी परिसरात पाझर तलाव आणि जवळच कोराडी धरण असल्याने वन्य प्राण्यांना पिण्याचे पाणी व हिरवा चारा उपलब्ध होत आहे.
यामुळे या भागात नीलगाई, हरणे, कोल्हे आदी वन्य प्राण्यांचा वावर वाढल्याचे दिसून येत आहे. त्याच कारणामुळे या प्राण्यांच्या शिकारीसाठी बिबट्यानेही आपला मोर्चा या परिसराकडे वळविल्याचा अंदाज जाणकार व्यक्त करत आहेत.
जखमी नीलगाईच्या पार्श्वभाग, पाठ आणि पोटावर नखांनी ओरबडल्याच्या जखमा होत्या. तसेच पोटावर मोठी जखम झाल्याने ती रक्तबंबाळ अवस्थेत पडलेली दिसून आली.
मोहाडी परिसरात मागील चार दिवसांत बिबट्याच्या हल्ल्याची ही दुसरी घटना असून शेतकरी वर्गात भीतीचे वातावरण आहे. वनविभागाने या घटनांची गंभीर दखल घेऊन मोहाडी परिसरात तातडीने उपाययोजना कराव्यात, अशी मागणी ग्रामस्थांकडून होत आहे.
यापूर्वीही परिसरातील मौजे शिंदी येथे बिबट्याने माकडाची शिकार करून झाडावर लटकविले होते. तसेच शिंदी शिवारात दोन कुत्र्यांची शिकार केल्याच्या घटनाही घडल्या होत्या.
Related News
- लोणारमध्ये संतापजनक प्रकार! ६० वर्षीय मातंग महिलेवर मारहाण व विनयभंग; रमेशआण्णा मुळेवर अॅट्रॉसिटी गुन्हा
- लोणारमध्ये कंत्राटदारांची मोठी फसवणूक उघड; बनावट शिक्क्यांद्वारे लाखोंचा घोटाळा, 5 आरोपी अटकेत
- Maharashtra Weather Alert : 17 ते 20 मार्च राज्यात मुसळधार पावसाचा इशारा; शेतकऱ्यांना पंजाबराव डख यांचा इशारा
अधिक स्थानिक बातम्यांसाठी Kattanews.in ला भेट द्या.
