Jalna news : ट्रॅक्टर ट्रॉलीच्या चाकाखाली येऊन दोन मजुरांचा मृत्यू.खड्ड्यातून ट्रॅक्टर जाताच दोन बांधकाम मजूर खाली पडून ट्रॉलीच्या मागच्या टायर खाली येऊन मृत झाल्याची घटना गुरुवारी सकाळी जालना जिल्ह्यातील अंबड तालुक्यातील गोंदी-शहागड मार्गावर झाली. शहागड महामार्गावर गुरुवारी सकाळी ९ वाजता बांधकाम मजूर घेऊन जात होते. गोंदी रोडवरील शहागडच्या ३३ केव्ही महाराष्ट्र विद्युत वितरणच्या सब स्टेशनसमोर आल्यानंतर रस्त्याच्या कडेला असलेल्या खड्ड्यात ट्रॅक्टर आदळून ट्रॉलीमध्ये बसलेले दोन मजूर खाली पडून ट्रॉलीच्या मागच्या टायरच्या खाली आले.
दिलीप चुरोंजीलाल कलमे (२२, बांधकाम मजूर, रा. रामटेक शिराली, जि. हरदा, रा. मध्य प्रदेश, ह. मु. संजयनगर, ता. गेवराई, जि. बीड) याला प्रथम शहागड येथील खासगी दवाखान्यात हलवण्यात आलेले होते. परंतु, या ठिकाणी न घेता सरकारी दवाखान्यात पाठवण्यात आले.शहागड येथील प्राथमिक आरोग्य केंद्रात वैद्यकीय अधिकारी डॉ. मोहम्मद साद यांनी दिलीप चुरोंचीलाल याला तपासून मृत घोषित केले.
तर दुसरा जखमी करण (रा. रामटेक शिराली, जि. हरदा, रा. मध्य प्रदेश, ह. मु संजयनगर, ता. गेवराई, जि.बीड) याला शहागड येथील खासगी रुग्णालयात प्रथम उपचार करून रुग्णवाहिकेने छत्रपती संभाजीनगर येथील एमजीएम दवाखान्यात हलवण्यात आलेले होते. उपचारादरम्यान त्याचीही प्राणज्योत मालवली. दोघांचेही मृतदेह शवविच्छेदन करून नातेवाइकांच्या ताब्यात देण्यात आले. गोंदी पोलिस ठाण्यात गुन्हा दाखल करण्यात आला आहे. या अपघातामुळे परिसरात हळहळ व्यक्त करण्यात आली.
