
crime : जन्मदात्री आईची निघृण हत्या करून तिचे काळीज व अन्य अवयव शिजवून खाण्याचा प्रयत्न करणाऱ्या नराधम मुलाला मुंबई उच्च न्यायालयाने mumbai highcourt मंगळवारी चांगलाच झटका दिला. न्यायमूर्ती रेवती मोहिते-डेरे आणि न्यायमूर्ती पृथ्वीराज चव्हाण यांच्या खंडपीठाने हा दुर्मिळातील दुर्मीळ गुन्हा आहे. अशा गुन्ह्यातील आरोपीला माफी नाही, तर या नरभक्षक प्रवृत्तीला ठेचण्याचीच गरज आहे, असे निरीक्षण नोंदवत नराधम आरोपी सुनील कुचकोरवीला कोरलहापूर सत्र न्यायालयाने ठोठावलेल्या फाशीच्या शिक्षेवर शिक्कामोर्तब केले.
आरोपी सुनील कुचकोरवी याला कोल्हापूरच्या जिल्हा सत्र न्यायालयाचे न्यायाधीश महेश कृष्णाजी जाधव यांनी दोषी ठरवून जुलै २०२१ मध्ये फाशीची शिक्षा ठोठावली होती. या शिक्षेविरोधात आरोपीने उच्च न्यायालयात आव्हान दिले होते. तर राज्य सरकारने फाशीच्या शिक्षेवर शिक्कामोर्तब करण्यासाठी उच्च न्यायालयात याचिका दाखल केली होती. त्यावर न्यायमूर्ती रेवती मोहिते-डेरे आणि न्यायमूर्ती पृथ्वीराज चव्हाण यांच्या खंडपीठासमोर दीर्घ सुनावणी झाल्यानंतर राखून ठेवलेला निर्णय मंगळवारी जाहीर केला.
नेमके प्रकरण काय ?
कोल्हापूरमध्ये २८ ऑक्टोबर २०१७ रोजी हत्येची घटना घडली होती. आईने दारू पिण्यासाठी पैसे दिले नाहीत, या रागातून सुनीलने आईची निर्चुण हत्या केली. केवळ हत्या करण्यावर न थांबता सुनीलने आईचे काळीज व इतर अवयवांना चटणी, मीठ लावून ते अवयव स्टोव्हवर शिजवून खाण्याचा प्रयत्नही केला, रक्तबंबाळ अवस्थेतील आईच्या मृतदेहाशेजारी सुनील बसलेला असल्याचे शेजारच्या मुलाने पाहिले. त्यानंतर त्याला अटक करण्यात आली. थरकाप उडवणारे कृत्य केलेल्या या घटनेने कोल्हापूर जिल्ह्यासह संपूर्ण राज्यात खळबळ उडाली होती.
जिल्हा न्यायालयात या खटल्यात ३४ साक्षीदारांपैकी प्रत्यक्षात १२ जणाच्या साक्षी नोंदवण्यात आल्या, त्यात तपास अधिकारी संजय मोरे, गुरुप्रसाद जाधव मयुर कंदले, नवनाथ डवरी, फिर्यादी राजू कुचकोरवी, डॉ. नितीन जगताप, रफिक बागवान, तानाजी चौगुले, नथुराम गायकवाड, सहाय्यक निरीक्षक तृप्ती देशमुख, उपनिरीक्षक भाऊसाहेब मलगुडे, रक्षका कुचकोरवी यांच्या साक्षी महत्वाच्याठरल्या होत्या.