
buldhana news : चिमुकलीचा पाळणा २०० फुट उडून पडल्यामुळे मृत्यू. बुलढाणा जिल्ह्यातील चिखली तालुक्यातील देऊळगाव घुबे या ठिकाणी अचानक आलेल्या वादळात घरात लोखंडी अँगलला बांधलेला पाळणा तब्बल दोनशे फूट उंच जाऊन खाली कोसळल्याने पाळण्यातील सहा महिन्याच्या चिमुकलीचा जागीच मृत्यू झाल्याची हृदयद्रावक घटना देऊळगाव घुबे येथे ११ जून रोजी रात्री घडली.देऊळगाव घुबे येथे आलेल्या वादळामुळे अनेकांच्या घरावरील टिनपत्रे उडाले. रात्री नऊ वाजताच्या सुमारास वादळी वाऱ्यासह मुसळधार पाऊस सुरू झाला.
वादळाचा वेग मोठा असल्याने अनेक झाडे उन्मळून पडली. वादळामुळे वीज वितरण विभागाने वीजपुरवठा खंडित केला. त्यामुळे गावकरी जीव मुठीत धरून आपापल्या घरात बसलेले होते. भरत साखरे यांची सई नावाची चिमुकली घरात लोखंडी अँगलला बांधलेल्या झोक्यात झोपली होती. घरातील इतर सदस्य जेवायला बसणार तेवढ्यात वाऱ्याने घरावरील टिनपत्रे लोखंडी अँगल आणि बांधलेल्या झोक्यासह हवेत उडाले. हवेत उडालेला झोका घरापासून दोनशे फूट अंतरावर जाऊन आदळला.
त्यामध्ये झोक्यातील चिमुकली जमिनीवर आदळून तिचा जागीच मृत्यू झाला. या घटनेची माहिती पोलिस प्रशासनाला मिळताच ठाणेदार विकास पाटील यांनी घटनास्थळी भेट दिली. तसेच महसूलचे कर्मचाऱ्यांनी तत्काळ घटनास्थळी धाव घेऊन पंचनामा केला. गावकऱ्यांनी तातडीने चिमुकलीला रुग्णालयात दाखल केले. मात्र, डॉक्टरांनी तिला मृत घोषित केले.